ఎన్టీఆర్, చిరు సిన్మాలపై నిషేధం?

హైదరాబాద్: అధికార కాంగ్రెస్ పార్టీ మీద, సాక్షి పత్రికలో చానల్స్ లో ప్రకటనల మీద, ప్రోగ్రాంల మీద తెలుగుదేశం ఎన్నికల కమిషన్ ను ఫిర్యాదు చేసింది. ఇలా ఉండగా కాంగ్రెస్ కూడా తెలుగుదేశంనాయకుల మీద, చిరంజీవి మీద ఎన్నికల సంఘానికి ఫిర్యాదు చేయనున్నారు. ఎన్నికలు ముగిసే వరకు సీనియర్ ఎన్టీఆర్, చిరంజీవి, బాలకృష్ణ, జూనియర్ ఎన్టీఆ సినిమాలను ప్రైవేటు టీవీ చానల్స్ లో ప్రసారం చేయకుండా అడ్డుకోవాలని కాంగ్రెస్ పార్టీ ఎన్నికల సంఘానికి సోమవారం వినతి పత్రం సమర్పించనుంది.

ఎన్నికల సమయంలో దూరదర్శన్‌లో రాజకీయ పార్టీల నేతల సినిమాలను ప్రదర్శించరాదనే నిబంధన చాలాకాలంగా అమలులో ఉందని కాంగ్రెస్‌ వర్గాలంటున్నాయి. ప్రైవేటు టీవీ ఛానళ్లలో ఇలాంటి నిబంధన లేదని ఇప్పుడు వాటిలోనూ నిషేధం ఉండాలని కాంగ్రెస్‌ డిమాండ్‌ చేస్తోంది. చిరంజీవి, పవన్‌, బాలకృష్ణ, జూ.ఎన్టీఆర్‌లు తమ పార్టీల తరఫున పెద్దఎత్తున ప్రచారం సాగిస్తున్నారు. వీరి సినిమాల ప్రదర్శనను ఎన్నికలయ్యేవరకు ప్రైవేటు ఛానళ్లలోనూ నిలిపివేయాలంటూ కాంగ్రెస్‌ పార్టీ ఎన్నికల సంఘాన్ని ఆశ్రయించబోతోంది. దీనిపై శనివారం కాంగ్రెస్‌ శాసనసభాపక్ష కార్యాలయంలో ఆర్థిక మంత్రి రోశయ్య పార్టీ నేతలతో చర్చించారు. సోమవారం ఎన్నికల సంఘానికి ఫిర్యాదు ఇవ్వాలని నిర్ణయించారు.