తదుపరి సిఎం ఎవరు?

రెండో విడత ఎన్నికల తర్వాత విజయం మాదంటే మాదంటూ కాంగ్రెస్, తెలుగుదేశం కార్యాలయాల్లో ఈ సాయంత్రం స్వీట్లు పంచుకున్నారు. తెలుగుదేశం ప్రధాన కార్యాలయం ఎదుట ఆనందంతో టపాకాయలు కాల్చుకున్నారు. 230 స్ధానాల్లో గెలుస్తామని రాజశేఖరరెడ్డి అంటుండగా 200 పైగా స్ధానాలు మహాకూటమివేనని చంద్రబాబు నాయుడు బల్ల గుద్ది చెబుతున్నారు. ఎన్నికల ఫలితాలు వెలువడే మే 16 నాటికి తాను ఆస్పత్రి నుంచి డిశ్చార్జి అవుతానని, తెలుగుదేశం విజయోత్సవాల్లో పాల్గొంటానని జూనియర్ ఎన్టీఆర్ ఇప్పటికే టీవీ ముఖంగా తెలియజేశారు. ప్రజారాజ్యం మూడో స్ధానంలో మిగిలిపోయినట్టు స్పష్టం కావడంతో వారు కింగ్ మేకర్ పాత్రకు సిద్ధమవుతున్నారు.

ఇంతకీ గెలుపెవరిది? ఎవరి అంచనాలు వారి కున్నాయి. సామాన్యులు మాత్రం తమ నిర్ణయాన్ని గుట్టుగా ఓటింగ్ మెషిన్లలో నిక్షిప్తం చేశారు. ఒకటి మాత్రం నిజం రాజశేఖరరెడ్డి మళ్ళీ ముఖ్యమంత్రి అయితే రాష్ట్రంలో కాంగ్రెస్ బెంగాల్ లో సిపిఎం లాగా పాతుకు పోయినట్టే. కొన్ని మీడియా సంస్ధలకు మళ్ళీ ఇబ్బందులు తప్పవు. చంద్రబాబు నాయుడు ముఖ్యమంత్రి అయితే వైఎస్ ప్రభుత్వ అక్రమాల మీద ప్రత్యేక కోర్టును నియమిస్తారు. కేంద్రంలో చంద్రబాబు అనుకూల ప్రభుత్వం ఏర్పడితే వైఎస్ సిబీఐ ఇంటరాగేషన్ ను కూడా ఎదుర్కోవలసి ఉంటుంది. మరో ఇరవై రోజుల్లో ఏం జరగనుందో చూడాలి.