సీతయ్య లేఖలే రాస్తాడు

సీతయ్య లేఖలే రాస్తాడు అనేది ఇప్పుడు రాష్ట్ర రాజకీయాల్లో ఓ ఊతపదమయ్యేట్లుంది. తెలుగుదేశం రాజ్యసభ సభ్యుడు, సినీ నటుడు హరికృష్ణ ప్రజారాజ్యం పార్టీ అధ్యక్షుడు చిరంజీవికి బహిరంగ లేఖ రాశారు. అంతకు ముందు తమ పార్టీ అధ్యక్షుడు నారా చంద్రబాబు నాయుడికి కూడా బహిరంగ లేఖనే రాశారు. ఏదైనా చెప్పదలుచుకున్నప్పుడు మీడియా ప్రతినిధుల సమావేశంలో ఏర్పాటు చేస్తారు. ప్రత్యేక సందర్భమైతేనే బహిరంగ లేఖలు రాస్తారు. అయితే, హరికృష్ణ బహిరంగ లేఖలకు మారుపేరుగా నిలిచేట్లున్నారు. హరికృష్ణ బహిరంగ లేఖలు రాయడానికి ఓ కారణం ఉందంటున్నారు.

ఇంతకీ ఏమిటా కారణమంటే, మీడియా ప్రతినిధులు అడిగే ప్రశ్నలకు సమాధానాలు ఇవ్వడంలో తడబాటును తట్టుకోలేక, మీడియా ప్రతినిధులు వేసే ప్రశ్నలకు స్పాంటేనియస్ గా సమాధానాలు ఇవ్వడంలో ఎదురయ్యే ఇబ్బందులను గ్రహించి ఆయన బహిరంగ లేఖలను తన అస్త్రాలుగా సీతయ్య వాడుకుంటున్నారని గిట్టనివారంటున్నారు. హరికృష్ణ బహిరంగ సభల్లోనే ఎక్కువగా మాట్లాడుతారు. మీడియాను ఫేస్ చేసేది చాలా తక్కువ. ఒక్కవేళ మీడియాతో మాట్లాడాల్సి వస్తే తాను మాట్లాడదలుచుకుంది చెప్పేసి వారి నుంచి ప్రశ్నలు వచ్చేలోగా వెళ్లిపోతారని ఆయనపై ఓ అపప్రథ ఉంది. ఏమైనా, ఎవరికి ఏది ఇష్టమో అది చేస్తారు. హరికృష్ణను ఈ విషయంలో తప్పు పట్టడం సరి కాదేమో.