కిరణ్‌పై కత్తులు నూరుతున్న బొత్స

By Pratap

Published: Thursday, September 1, 2011, 10:14 [IST]

ముఖ్యమంత్రి పీఠంపై కన్నేసిన పిసిసి అధ్యక్షుడు బత్స సత్యనారాయణ ముఖ్యమంత్రి కిరణ్ కుమార్ రెడ్డిపై కత్తులు నూరుతున్నట్లు తెలుస్తోంది. రాష్ట్ర కాంగ్రెసు చీఫ్‌గా పార్టీ అధిష్టానానికి ఆయన రహస్యంగా ఓ నివేదిక సమర్పించారట. అందులో కిరణ్ కుమార్ రెడ్డి అసమర్థతను ఆయన ఎత్తిచూపినట్లు చెబుతున్నారు. వైయస్ జగన్ వర్గానికి చెందిన 29 మంది శాసనసభ్యుల విషయంలో ముఖ్యమంత్రి వైఖరి నష్టం చేసిందని ఆయన ఫిర్యాదు చేసినట్లు చెబుతున్నారు.

ముఖ్యమంత్రి నిర్లిప్త వైఖరి వల్లనే 29 మంది శానససభ్యులు జగన్ వైపు వెళ్లారని బొత్స అధిష్టానానికి పూసగుచ్చినట్లు వివరించారని అంటున్నారు. పది, పన్నెండు మంది శాసనసభ్యులకు మించి జగన్ వైపు వెళ్లబోరని కిరణ్ కుమార్ రెడ్డి అధిష్టానానికి చెప్పారని, అయితే ఆ సంఖ్య 29కి పెరిగిందని, జగన్ వైపు వెళ్తారని భావించే శాసనసభ్యులతో కిరణ్ కుమార్ రెడ్డి మాట్లాడకపోవడం వల్లనే అలా జరిగిందని బొత్స చెప్పినట్లు సమాచారం. ఏమైనా, బొత్సకు 2014లోపలే ముఖ్యమంత్రి కావాలనే ఆశ రోజు రోజుకూ పెరుగుతోందని అంటున్నారు.

Published On September 1, 2011