ఉండవల్లి ద్వారా ఆజాద్ పాచిక

By Pratap

Published: Tuesday, September 13, 2011, 8:53 [IST]

హైదరాబాద్‌ను ఇరు ప్రాంతాల రాజధానిగా చేసే విషయంపై కాంగ్రెసు సీమాంధ్ర పార్లమెంటు సభ్యుడు ఉండవల్లి అరుణ్ కుమార్ తెలంగాణ పార్లమెంటు సభ్యుల ముందు పెట్టిన ప్రతిపాదన వెనక పార్టీ ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ ఉన్నారనే వార్తలు వస్తున్నాయి. సమస్యకు పరిష్కారం కనుక్కునే దిశలో సీమాంధ్ర నాయకుల మనోగతాన్ని తెలుసుకోవడానికి ఉండవల్లి ద్వారా ఆజాద్ ఓ పాచిక వేసినట్లు భావిస్తున్నారు. రాష్ట్ర విభజనకు అభ్యంతరం లేదని, అయితే హైదరాబాదును ఉమ్మడి రాజధానిగా చేసే విషయంపై చర్చలు చర్చలు జరుపుదామని ఉండవల్లి ప్రతిపాదించారు.

హైదరాబాదును ఉమ్మడి రాజధానిగా చేయాలనే ప్రతిపాదనను కాంగ్రెసు తెలంగాణ ప్రాంత పార్లమెంటు సభ్యులు వ్యతిరేకిస్తూనే ఇరు ప్రాంతాల నాయకుల మధ్య చర్చలను ఆహ్వానించారు. దీంతో సీమాంధ్ర పార్లమెంటు సభ్యుడు కావూరి సాంబశివ రావు వంటి కరుడు గట్టిన సమైక్యవాదుల అరికాలి మంట నెత్తికెక్కినట్లు తెలుస్తోంది.

Published On September 13, 2011