"గుత్తి వంకాయ పలావ్" ఇంట్లోనే ఈజీగా ఎలా చేయాలంటే..?
కూరగాయల రాజు వంకాయకు ఉండే ప్రాధాన్యత అంతా ఇంతా కాదు. తెలుగు వారి వంటింట్లో వంకాయకు ఉన్న స్థానం ప్రత్యేకమైనది. "వంకాయ వంటి కూర.. వావి వరుసల వంటి చుట్టం లేదు" అనే సామెతే దీనికి నిదర్శనం. రోజువారీ భోజనంలోనూ, పండుగ వంటల్లోనూ వంకాయ లేకుండా భోజనం పూర్తైనట్లు అనిపించదు. చిన్న గుండ్రటి వంకాయల నుంచి పొడుగు వంకాయల వరకు, ముదురు ఊదా రంగు నుంచి తెల్లని వంకాయల వరకు ప్రతి రకం వేర్వేరు రుచిని, వంటలో వేర్వేరు ప్రత్యేకతను అందిస్తుంది.
గుత్తి వంకాయ పలావ్ (Baby Brinjal Pulao) అనేది ఆంధ్రప్రదేశ్కు చెందిన అత్యంత రుచికరమైన సాంప్రదాయ వన్-పాట్ రైస్ డిష్. లేత గుత్తి వంకాయలు, సువాసనభరితమైన బాస్మతి బియ్యం, ఘాటు మసాలాల కలయికతో తయారయ్యే ఈ పలావ్ రుచి బిర్యానీకి ఏమాత్రం తీసిపోదు. ముఖ్యంగా వీకెండ్స్, స్పెషల్ లంచ్లు, అతిథులు ఇంటికి వచ్చినప్పుడు ఈ వంటకం అద్భుతమైన ఎంపికగా ఉంటుంది. చల్లటి పెరుగు రైతా లేదా మిర్చి కా సాలన్తో ఈ పలావ్ను వడ్డిస్తే రుచి మరింత రెట్టింపు అవుతుంది.
కావలసిన పదార్థాలు..
- బాస్మతి బియ్యం - 1 కప్పు (30 నిమిషాలు నానబెట్టాలి)
- లేత గుత్తి వంకాయలు - 6 నుంచి 8
- ఉల్లిపాయ - 1 (సన్నగా తరిగినది)
- టమాటో - 1 (చిన్న ముక్కలుగా కట్ చేసినది)
- పచ్చిమిర్చి - 3 నుంచి 4 (చీల్చినవి)
- నూనె - 2 టేబుల్ స్పూన్లు
- నెయ్యి - 1 టేబుల్ స్పూన్
- కొత్తిమీర - కొద్దిగా
- పుదీనా - కొద్దిగా
- ఉప్పు - రుచికి సరిపడా
- బిర్యానీ దినుసులు:
- బిర్యానీ ఆకు - 1
- షాజీరా - ½ టీస్పూన్
- దాల్చిన చెక్క - చిన్న ముక్క
- లవంగాలు - 3
- యాలకులు - 2
- స్టార్ అనిస్ - 1 (ఐచ్ఛికం)
- ధనియాలు - 1 టేబుల్ స్పూన్
- జీలకర్ర - ½ టీస్పూన్
- నువ్వులు - 1 టేబుల్ స్పూన్
- పల్లీలు లేదా జీడిపప్పు - 2 టేబుల్ స్పూన్లు
- ఎండు కొబ్బరి తురుము - 2 టేబుల్ స్పూన్లు
- అల్లం వెల్లుల్లి పేస్ట్ - 1 టేబుల్ స్పూన్
- కారం - 1 టీస్పూన్
- పసుపు - చిటికెడు
- గరం మసాలా - ½ టీస్పూన్
- ఉప్పు - తగినంత
తయారీ విధానం..
- ముందుగా పాన్లో ధనియాలు, జీలకర్ర, నువ్వులు, పల్లీలు, ఎండు కొబ్బరిని విడివిడిగా దోరగా వేయించుకోవాలి. చల్లారిన తర్వాత మిక్సీలో వేసి అల్లం వెల్లుల్లి పేస్ట్, కారం, పసుపు, ఉప్పు, గరం మసాలా, కొద్దిగా నీరు వేసి మెత్తని పేస్ట్లా గ్రైండ్ చేసుకోవాలి.
- ( మసాలా పేస్ట్లో ఒక టీస్పూన్ చింతపండు గుజ్జు కలిపితే పలావ్కు స్వల్ప పుల్లటి రుచి వచ్చి మరింత టేస్టీగా ఉంటుంది.)
- లేత గుత్తి వంకాయలను శుభ్రంగా కడిగి, తొడిమలు తీసేయకుండా అడుగు భాగం నుంచి నాలుగు గాట్లు పెట్టాలి. వంకాయలు నల్లబడకుండా ఉప్పు కలిపిన నీటిలో వేయాలి.
- ఇప్పుడు సిద్ధం చేసుకున్న మసాలా ముద్దను ఒక్కో వంకాయలో జాగ్రత్తగా నింపాలి. మిగిలిన మసాలా పేస్ట్ను పక్కన పెట్టుకోవాలి.
- (చిన్న, లేత వంకాయలను ఎంచుకుంటే పలావ్ రుచి మరింత బాగుంటుంది.)
- అడుగు మందంగా ఉండే గిన్నె లేదా కుక్కర్లో నూనె, నెయ్యి వేయాలి. నూనె వేడెక్కిన తర్వాత బిర్యానీ ఆకు, షాజీరా, దాల్చిన చెక్క, లవంగాలు, యాలకులు, స్టార్ అనిస్ వేసి వేయించాలి.
- తర్వాత ఉల్లిపాయలు, పచ్చిమిర్చి వేసి బంగారు రంగు వచ్చే వరకు వేయించాలి. ఇప్పుడు టమాటో ముక్కలు వేసి మెత్తబడే వరకు ఉడికించాలి.
- మిగిలిన మసాలా పేస్ట్ను వేసి నూనె పైకి తేలే వరకు 2 నుంచి 3 నిమిషాలు వేయించాలి.
- ఇప్పుడు స్టఫ్ చేసిన వంకాయలను గిన్నెలో వేసి సిమ్ మంటపై మూత పెట్టి 5 నుంచి 7 నిమిషాలు మగ్గించాలి. మధ్య మధ్యలో జాగ్రత్తగా కలపాలి.
- వంకాయలు సగం ఉడికిన తర్వాత వాటి నుంచి వచ్చే మసాలా సువాసన పలావ్కు ప్రత్యేకమైన రుచిని అందిస్తుంది.
- ఇప్పుడు 1 కప్పు బియ్యానికి 1½ కప్పుల నీళ్లు పోసి ఉప్పు వేసి బాగా మరగనివ్వాలి. నీరు మరిగిన తర్వాత నానబెట్టిన బాస్మతి బియ్యాన్ని నీళ్లు వడకట్టి అందులో వేయాలి.
- పైన కొత్తిమీర, పుదీనా చల్లి మూతపెట్టి మీడియం మంటపై అన్నం 80 శాతం ఉడికే వరకు ఉంచాలి.
- నీరు పూర్తిగా ఇంకిపోతున్నప్పుడు మంటను సిమ్లోకి మార్చి, మూతపై బరువు పెట్టి లేదా విజిల్ లేకుండా 10 నిమిషాలు దమ్ చేయాలి.
చిట్కాలు..
- బాస్మతి బియ్యాన్ని కనీసం 30 నిమిషాలు నానబెడితే అన్నం పొడిపొడిగా వస్తుంది.
- వంకాయలను ఎక్కువగా ఉడికించకండి. అవి మెత్తబడితే పలావ్లో కలిసిపోయే అవకాశం ఉంటుంది.
- నెయ్యి తప్పనిసరిగా ఉపయోగిస్తే పలావ్కు బిర్యానీ తరహా సువాసన వస్తుంది.
- మసాలా పేస్ట్లో జీడిపప్పు ఉపయోగిస్తే రిచ్ టేస్ట్ వస్తుంది.
- దమ్ సమయంలో మూతను తరచూ తీసి చూడకండి.
Click it and Unblock the Notifications
Sign in with Google