"గోంగూర పచ్చి రొయ్యల ఫ్రై" ఇలా చేస్తే ప్లేట్ ఖాళీనే ..!

తెలుగు రాష్ట్రాల్లోని వంటలలో గోంగూరకు ఒక ప్రత్యేక స్థానం ఉంటుంది. అన్ని కూరలు ఉన్నా కానీ గోంగూర అడిగే వారే తెలుగు వారు అంటుంటారు. ఇది సహజమైన విటమిన్ C, ఐరన్, యాంటీఆక్సిడెంట్లతో నిండి ఉంటుంది. అందుకే, గోంగూర వంటకాలు రుచి మాత్రమే కాకుండా ఆరోగ్యానికి కూడా మంచివిగా ఉంటాయి. కాగా గోంగూర పప్పు, గోంగూర పచ్చడి, గోంగూర చికెన్, గోంగూర మటన్, గోంగూర రొయ్యలు ఇలాంటివి మనకు తెలిసిందే.

అయితే చికెన్, మటన్ కంటే కూడా సీఫుడ్ లతో గోంగూర కొత్తగా ఉంటుందని చెబుతున్నారు. మరీ ముఖ్యంగా రొయ్యలకు గోదావరి జిల్లాల్లో ప్రత్యేక గుర్తింపు ఉంది. ముఖ్యంగా గోంగూరతో కలిపి చేసే రొయ్యల ఫ్రై అక్కడి సంప్రదాయ వంటకాల్లో ఒకటిగా నిలుస్తుంది. గోంగూరలోని పులుపు, రొయ్యల మృదుత్వం కలిసి ఈ ఫ్రై కు అదిరిపోయే రుచిని ఇస్తాయి. అన్నంతో తింటే అసలైన గోదావరి టచ్ కనిపిస్తుంది. అందుకే "గోంగూర పచ్చి రొయ్యల ఫ్రై " ఇలా చేస్తే ప్లేట్ ఖాళీ చేయడం పక్కా అంటారు. ఈ టేస్టీ రెసిపీ మీకోసం ప్రత్యేకంగా..

రొయ్యలు - 250 గ్రాములు (శుభ్రం చేసినవి)

గోంగూర - 2 కట్టలు

ఉల్లిపాయలు - 2 (సన్నగా తరిగినవి)

పచ్చిమిర్చి - 3 నుంచి 4 (చీల్చినవి)

అల్లం-వెల్లుల్లి పేస్ట్ - 1 టేబుల్ స్పూన్

పసుపు - ½ టీస్పూన్

కారం - 1 నుంచి 1½ టీస్పూన్లు (రుచికి అనుగుణంగా)

ఉప్పు - అవసరానికి

నూనె - 3 టేబుల్ స్పూన్లు

కరివేపాకు - 1 రెమ్మ

కొత్తిమీర - కొద్దిగా (తరిగినది)

ఎండుమిర్చి - 2

వెల్లుల్లి రెబ్బలు - 6 నుంచి 8 (నలిగినవి)

ముందస్తు ప్రక్రియ..

గోంగూర ఆకులను వేరు చేసి బాగా కడగాలి.

కొద్దిగా నీరు పోసి గోంగూరను మెత్తగా ఉడికించాలి.

చల్లారిన తర్వాత కొంచెం నూరి పక్కన పెట్టుకోవాలి.

రొయ్యలను శుభ్రం చేసి పసుపు, ఉప్పు చిటికెడు వేసి కలిపి ఉంచాలి.

తయారీ విధానం..

పాన్‌లో ఒక టేబుల్ స్పూన్ నూనె వేడి చేసి, రొయ్యలను లేతగా వేయించాలి. ( ఫ్రై లాగా మాత్రమే )

అదే పాన్‌లో మిగతా నూనె వేసి వేడి చేయాలి. ముందుగా ఎండుమిర్చి, వెల్లుల్లి రెబ్బలు వేసి మంచి వాసన వచ్చే వరకు పోపు పెట్టాలి.

ఇప్పుడు ఉల్లిపాయలు, కరివేపాకు, పచ్చిమిర్చి వేసి ఉల్లిపాయలు గోధుమ రంగులోకి మారే వరకు వేయించాలి.

అల్లం-వెల్లుల్లి పేస్ట్ వేసి పచ్చివాసన పోయే వరకు బాగా వేయించాలి.

ఇప్పుడు ఉడికించి నూరిన గోంగూర, కారం, పసుపు, ఉప్పు వేసి బాగా కలిపి 5 నిమిషాలు మగ్గనివ్వాలి.

ఇందులో ముందుగా వేయించిన రొయ్యలను మెల్లగా కలపాలి. మూత పెట్టి సన్నని మంట మీద 8-10 నిమిషాలు ఉడికించాలి.

చివరగా కొత్తిమీర చల్లి స్టవ్ ఆఫ్ చేయాలి.

English summary

Gongura Prawn fry : Gongura has a special place in the cuisines of the Telugu states. In particular, prawn curry made with Gongura is one of the traditional dishes there.