కలగూర పులుసు ఇలా చేస్తే రోజూ తినేదాని కన్నా డబుల్ తింటారు!
కలగూర పులుసు ఎంతో సాంప్రదాయబద్ధమైన, రుచికరమైన వంటకం. పేరుకు తగ్గట్టే ఇంట్లో అందుబాటులో ఉన్న రకరకాల కూరగాయలన్నింటినీ కలిపి, చింతపండు పులుసు మరియు ప్రత్యేకమైన మసాలాలతో దీనిని తయారు చేస్తారు. సంక్రాంతి వంటి పండుగ సమయాల్లో దీనిని ప్రత్యేకంగా వండుతారు. నోరూరించే ఈ కలగూర పులుసు తయారీ విధానం ఇక్కడ చూడండి.
కావలసిన పదార్థాలు
కూరగాయల ముక్కలు (2 కప్పులు): సొరకాయ, మునక్కాయలు, వంకాయలు, బెండకాయలు, గుమ్మడికాయ, బంగాళదుంప, క్యారెట్, చిలగడదుంప, ముల్లంగి (మీ అభిరుచికి తగ్గట్టుగా) పచ్చిమిర్చి: 3 లేదా 4 (నిలువుగా చీల్చినవి) ఉల్లిపాయ: 1 పెద్దది (ముక్కలుగా తరిగినవి) టొమాటో: 1 పెద్దది (ముక్కలుగా చేసినవి) చింతపండు: నిమ్మకాయ సైజు అంత (నానబెట్టి పులుసు తీసుకోవాలి) బెల్లం తురుము: 1 నుండి 2 చెంచాలు ఉప్పు: రుచికి సరిపడా కారం: 1న్నర చెంచా పసుపు: అర చెంచా కొత్తిమీర: కొద్దిగా జీలకర్ర మెంతుల పొడి: 1 చెంచా ధనియాల పొడి: 1 చెంచా నూనె: 2 లేదా 3 చెంచాలు పోపు గింజలు: 1 చెంచా కరివేపాకు: రెండు రెమ్మలు ఇంగువ: పావు చెంచా
తయారీ విధానం
ముందుగా స్టవ్ మీద ఒక పెద్ద గిన్నె లేదా కుక్కర్ పెట్టి, తరిగిన కూరగాయ ముక్కలన్నీ (వంకాయ, బెండకాయలు మినహా) వేయాలి. వాటికి తగినన్ని నీళ్లు, కొద్దిగా పసుపు, ఉప్పు కలిపి ముక్కలను ముప్పావు వంతు వరకు ఉడికించుకోవాలి. ఆ తర్వాత అందులో వంకాయ, బెండకాయ ముక్కలు, ఉల్లిపాయ, పచ్చిమిర్చి, టొమాటో ముక్కలు వేసి, చింతపండు పులుసును పోయాలి.
పులుసు మసాలా తయారీ
ఇప్పుడు ఆ మిశ్రమంలో కారం, బెల్లం తురుము, ముందుగా సిద్ధం చేసుకున్న జీలకర్ర మెంతుల పొడి, ధనియాల పొడి వేసి బాగా కలపాలి. కూరగాయ ముక్కలన్నింటికీ పులుపు, కారం, మసాలాలు బాగా పట్టేలా మంటను మీడియం ఫ్లేమ్లో ఉంచి 10 నుండి 12 నిమిషాల పాటు మరిగించాలి.
తాలింపు
పులుసు చిక్కబడ్డాక స్టవ్ ఆపాలి. మరొక చిన్న పాన్లో నూనె వేడి చేసి.. ఆవాలు, జీలకర్ర, ఎండుమిర్చి, కరివేపాకు మరియు ఇంగువ వేసి తాలింపు వేయించాలి. ఈ తాలింపును మరిగిన పులుసులో వేసి కలపాలి. చివరగా సన్నగా తరిగిన కొత్తిమీర చల్లుకుంటే ఎంతో రుచికరమైన కలగూర పులుసు సిద్ధం. ఈ పులుసు వేడివేడి అన్నంతో తింటే అద్భుతంగా ఉంటుంది. వండిన వెంటనే కంటే, కాసేపు ఆగి తింటే ముక్కలకు పులుసు పట్టి మరింత రుచిగా ఉంటుంది.
Click it and Unblock the Notifications
Sign in with Google