వారములు - హోరాలలో చేయవలసిన కార్యాలు

డా. యం. ఎన్. ఆచార్య - ప్రముఖ అంతర్జాతీయ జ్యోతిష, జాతక, వాస్తు శాస్త్ర పండితులు - శ్రీమన్నారాయణ ఉపాసకులు. సునంద రాజన్ జ్యోతిష, జాతక, వాస్తు కేంద్రం. తార్నాక -హైదరాబాద్ - ఫోన్: 9440611151

శ్లో|| మందమారేజ్య భూపుత్ర సూర్య శుక్రేందుజేందవః
పరిభ్రమంత్యధోధశతమదాదధ: క్రమేణస్యు: చతుర్థా దివసాధిపా:

అన్ని కక్ష్యలకంటే పైన నక్షత్ర కక్ష్య దాని తరువాత శని కక్ష్య. ఆ శని కక్ష్య నుండి నాల్గవ కక్ష్య సుర్య కక్ష్య కాబట్టి మొదటి వారం సూర్య ( ఆది ) వారము, సూర్యునికి నాల్గవ కక్ష్య చంద్ర కక్ష్య కాబట్టి రెండవ వారం చంద్ర ( సోమ ) వారము, చంద్రునికి నాల్గవ కక్ష్య కుజ కక్ష్య కాబట్టి మూడవ వారం కుజ ( మంగళ ) వారము, కుజునికి నాల్గవ కక్ష్య బుధ కక్ష్య కాబట్టి నాల్గవ వారం బుధవారము, బుధునికి నాల్గవ కక్ష్య గురు కక్ష్య కాబట్టి ఐదవవారం గురువారము, గురునికి నాల్గవ కక్ష్య శుక్ర కక్ష్య కాబట్టి ఆరవవారం శుక్ర(భృగు)వారము, శుక్రనికి నాల్గవ కక్ష్య శని కక్ష్య కాబట్టి ఏడవవారం శని ( మంద ) వారము.

ఈ క్రమముగా వారములు ఏర్పడినవి. కాబట్టి శాస్త్రాధారము వలన ఏడు గ్రహములే అని తెలుస్తున్నది. ప్రతిదినం సూర్యోదయ సూర్యాస్తమయ కాలాన్ని బట్టి ఒక గంటకాలం కలుపు కొని ఫలం చూడాలి. సూర్యోదయ సూర్యాస్తమయ మధ్యకాలాన్ని 12 చే భాగించగా ఎంతకాలం ( టైమ్‌ ) వచ్చునో చూసుకుంటూ 12 కాలాలు చూసి ఫలాన్ని తెలుసుకోవాలి. అలాగే రాత్రి కాలం - ఫలాన్ని చూసుకోవాలి.

* ఈ హోరాకాలం ఆపద అనే సముద్రాన్ని దాటించే పడవ వంటిది.

* ప్రయాణకాలంలో మంత్రిలాగా ఆలోచనలను తెలుపుతుంది.

* దీనికి మించిన శాస్తమ్రే లేదంటారు పెద్దలు.

* ప్రతిరోజు దీన్ని చూసి ప్రయాణించడం సమస్త కార్యాలు చేయడం శుభం.

* శుభగ్రహ హోరలు శుభాన్ని, పాప గ్రహ హోరలు పాపఫలాన్ని ఇస్తాయి.

హోరఫలాలు :-

1) రవి :-దావాలు, అప్పీళ్ళు చేయడానికి, ఉత్తరాలు, దస్తావేజులకు, నోట్లు వ్రాయడానికి, సన్మానాలు కోరడానికి, కొనుటకు, తిరుగుటకు, ఉద్యోగం కొరకు అప్లికేషను పెట్టడానికి మంచిది. న్యాయమైన పనులకు, రాజకీయ వ్యవహారాలు, అధికారులను కలుసుకోవడానికి, ఉద్యోగ ప్రయత్నాలు, వ్యవహరాలకు మంచిది.

2) చంద్ర :- గృహారంభం, గృహప్రవేశం, నగలు ధరించడం, ఒకరివద్ద కొత్తగా ప్రవేశించడానికి, వ్యవసాయారంభం, తోటలు పాతడానికి, స్త్రీ సౌఖ్యం పొందడానికి, గొప్ప వారిని దర్శించడానికి , నీటి ప్రయాణం చేయడానికి, కొత్త పాత్రల్లో భుజించడానికి మంచిది. నౌకా యానం, వ్యాపారులు, ఉప్పు, ప్రత్తి, వెండి, కంచు, పశువులు, బెల్లం, పంచదార మొదలగు తెల్లరంగు వస్తువులు కొనుటకు మంచిది.

3) కుజ :- పాపగ్రహం, కష్టనష్టాలు, చిక్కులు కలుగుతుంటాయి. ఏ మంచిపని ఆరంభించ కూడదు. విఘాతం, రక్తదర్శనం అవుతుంది. యుద్ధాలకు, సాహసకృత్యాలకు, భూసం బంధమైన విషయాలు మాట్లాడుకోవడానికి, సువర్ణ, తామ్ర, కంబళ, రస మొదలైన వస్తువులు కొనడానికి మంచిది. ఇందుకు సంబంధించిన వ్యాపారాలకు కూడా మంచిది.

4) బుధ :- నూతన వర్తకం, దానికి సంబంధించిన వ్యాపారాలకు, విద్యకు సంబంధించిన పనులకు, సమస్త శుభకార్యాలకు, దస్తావేజులు మొదలైన వ్రాతపనులకు మంచిది. నూతన వ్యాపారం, ఆటలు, అప్పు తీర్చడం, ముద్రణ, సువర్ణం, వస్త్రాలు, ప్రత్తి, నూలు, చర్మం మొదలగు వ్యాపారాలకు మంచిది.

5) గురు :- పిల్లలకు సంబంధించిన ఉయ్యాలలో వేయడం, ముక్కు చెవులు కుట్టడానికి, శుభాలకు, గొప్పవారిని దర్శించి బహుమతులు పొందడానికి, ఉద్యోగ సంబంధమైన విషయాలు, బాకీలు వసూలు చేయడానికి ఏ వస్తువై నా కొనడానికి, లాటరీ పజిల్స్‌ వేయడానికి, నూతన వస్త్రాలు ధరించడానికి, విద్యా సంబంధమైన సర్వకార్యాలకు మంచిది. వివాహం, ఉపనయనం, అప్పు తేవడం, తీర్చడం, గ్రంథరచన, ఉద్యోగంలో చేరడానికి, స్త్రీ సౌఖ్యానికి మంచిది.

6) శుక్ర :- సంబంధాలు నిశ్చయించడానికి, సంత కాలు పెట్టడానికి, ఔషధసేవకు, స్త్రీలతో మెలగడానికి, రైలు ప్రయాణానికి, నూతన వస్త్రాలు ధరించడానికి, సమస్త శుభకార్యాలకు, నిశ్చయ తాంబూలాలకు మంచిది. ఈ హోరలో కొనుటకంటె ఏ వస్తువైనా అమ్మడం మంచిది. నువ్వులు, నూనె, మినుములు, ఇనుము, నేతి వస్తువులు మొదలగు వ్యాపారానికి మంచిది.

7) శని :- భూమి అమ్మడానికి చాలా మంచిది. తైల సంబంధ వ్యాపారాలకు శుభం. మిగతా ఏ వ్యాపారాలకూ పనికిరాదు. మధ్య శాలారంభం, చౌర్యం, పొగాకు, దున్నలకు కాడి గట్టడం, తైల వ్యాపారాలు, గానుగ వేయడం, నీచవృత్తికి మంచిది.

English summary

Here is how the week days have been named according to Astrology.