అత్యంత ఆరాధ్యనీయ కంపెనీ ఇన్ఫోసిస్‌

న్యూఢిల్లీః దేశంలో అత్యంత ఆరాధ్యనీయ కంపెనీగా ఇన్ఫోసిస్‌ టెక్నాలజీస్‌ నిలిచింది. 2001 సంవత్సరానికి సాఫ్రస్‌ మోడ్‌ రూపొందించిన మొదటి 60 కంపెనీల జాబితాలో మరో 14 ఐటి కంపెనీలు కూడా వున్నాయి. పాత ఆర్ధిక వ్యవస్థనుంచి ఈ జాబితాలో రిలయన్స్‌ రెండో స్థానంలో వుంది.

బిజినెస్‌ బ్యారన్‌ పత్రిక కోసం ఈ సర్వేను నిర్వహించారు. రిలయన్స్‌ తర్వాత స్థానంలో విప్రో, హిందుస్తాన్‌ లివర్‌, ఎల్‌అండ్‌టి, బజాజ్‌ ఆటో, హెచ్‌డిఎఫ్‌సి, కోల్గెట్‌, టాటా పవర్‌, బిపిఎల్‌ వున్నాయి. నిర్వహణ తీరు, ఆర్ధిక వ్యవహారాలు, వాటాదారులకు చెల్లించే ప్రతిఫలం, కంపెనీ నైతిక నియమాల ఆధారంగా ఈ కంపెనీలకు రాంకింగ్‌లు ఇచ్చారు. అత్యంత ఆరాధ్యనీయ సిఇవో స్థానం అంబానీకి దక్కింది. ఆయన తర్వాత స్థానాల్లో విప్రో అజిమ్‌ ప్రేమ్‌జీ, ఇన్ఫోసిస్‌ నారాయణమూర్తి వున్నారు. రాష్ట్రానికి చెందిన సత్యం, విజువల్‌సాఫ్ట్‌ కూడా 60 కంపెనీల జాబితాలో స్థానం సంపాదించాయి.