పాక్‌ పై భారత్‌ కొత్తఅస్త్రం

న్యూఢిల్లీః పాకిస్తాన్‌ పై దౌత్యపరమైన యుద్ధం ప్రారంభించిన భారత్‌ తాజా వ్యూహం రూపొందిస్తున్నది. భారత దేశంలో కల్లోలం సృష్టించిన తీవ్రవాదుల్ని అప్పగించకుండా మొరాయిస్తున్న పాకిస్తాన్‌ కు బుద్ది చెప్పేందుకు ఐక్యరాజ్య సమితి కి నచ్చచెప్పి పాక్‌ పై ఆంక్షలు విధించేలా భారత్‌ పావులు కదుపుతున్నది. ఐక్యరాజ్యసమితి తీర్మానం ప్రకారం తీవ్రవాదానికి ప్రత్యక్షంగా లేదా పరోక్షంగా సహకరించే వారి కొమ్ముకాసే దేశాలపై ఆంక్షలు విధించే అవకాశం వుంది.

పాక్‌ తీవ్రవాదులకు ఆశ్రయం కల్పిస్తుందనేందుకు భారత్‌ వద్ద గట్టి సాక్ష్యాధారాలున్నాయి.అయినా పాక్‌ మొండిగా వ్యవహరించడంతో ఈ అంశాన్ని ఐక్యరాజ్యసమితిలో తేల్చుకొనేందుకు భారత్‌ రంగం సిద్ధం చేసుకుంటున్నది. తీవ్రవాదాన్ని ఏ దేశం కూడా ప్రోత్సహించరాదంటూ న్యూయార్క్‌ పైసెప్టెంబర్‌ 11న దాడి జరిగిన వెంటనే ఐక్యరాజ్య సమితి ఓ తీర్మానాన్ని ఆమోదించింది. అలా చేసిన దేశంపై ప్రపంచ దేశాలు ఆంక్షలు విధిస్తాయి. ఈ తీర్మానాన్ని పాక్‌ ఉల్లంఘించిందనే అభియోగాన్ని మోపి, పాకిస్తాన్‌ పై ఆంక్షలు విధించేలా చూడాలనేది భారత్‌ అభిమతం.