స్పీట్‌కు జీవిత ఖైదు మాత్రమే!

సిడ్నీ: ఫిజీ తిరుగుబాటు నాయకుడు జార్జ్‌స్పీట్‌కు విధించిన మరణ శిక్షను అధ్యక్షుడు జొసెఫొ లోయిలో జీవిత ఖైదుగా మార్చారు. భారత సంతతికి చెందిన మహేంద్ర చౌదరి ప్రభుత్వాన్ని కూల్చడానికి జరిగిన కుట్రకు నాయకత్వం వహించినస్పీట్‌కు హైకోర్టు మరణ శిక్ష విధించింది. ఈ శిక్షను అధ్యక్షుడు తగ్గించారు.

ఫిజీ రాజధాని సువాలోని హైకోర్టు జస్టిస్‌ మైఖెల్‌ స్కాట్‌స్పీట్‌కు ఉరి శిక్ష విధిస్తూ- స్పీట్‌కు మరణ శిక్ష విధించడం తప్ప మరో మార్గం లేదని, 1997 రాజ్యంగం ప్రకారం అది అనివార్యమని అన్నారు. ఈ తర్వాత కొద్దిసేపటికే స్పీట్‌ మరణ శిక్షను జీవిత ఖైదుగా మారుస్తూ ఫిజీ అధ్యక్షుడు లోయిలో డిక్రీపై సంతకం చేశారు. దీంతోస్పీట్‌ కనీసం పదేళ్లు జైలు శిక్ష అనుభవించాల్సి వుంటుంది.

హైకోర్టు నిర్ణయం డీల్‌లో భాగంగానే వెలువడిందని ఫిజీ వర్గాలు అభిప్రాయపడుతున్నాయి. దేశ ద్రోహ కేసుల్లో గరిష్ట శిక్షను జీవిత ఖైదుగా మారుస్తూ వారం రోజుల క్రితమే ప్రధాని లైసేనియా ఖరేసి మంత్రి వర్గం ఒక బిల్లును ప్రతిపాదించింది. ఈ బిల్లు ఇంకా ఆమోదం పొందలేదు. ప్రభుత్వాన్ని ఏర్పాటు చేయడానికి ఖరేసికి మెజారిటీ లేదు. దీంతోస్పీట్‌ పార్టీకి చెందిన ఐదుగురు సభ్యుల మద్దతు కోసం ఈ వైఖరి తీసుకున్నట్లు భావిస్తున్నారు.