నట్వర్‌ కోడలు దారుణ హత్య

న్యూఢిల్లీః కాంగ్రెస్‌ పార్టీ సీనియర్‌ నేత నట్వర్‌ సింగ్‌ కోడలు నటాషా సింగ్‌ దారుణ హత్యకు గురయ్యారు. దక్షిణ ఢిల్లీలో ఒక స్టార్‌ హోటల్‌ టెర్రస్‌పై ఆమె మృతదేహాన్ని కనుగొన్నారు. మొదట హోటల్‌ ఏడో అంతస్తు నుంచి దూకి ఆమె ఆత్మహత్య చేసుకున్నదని భావించారు.

అయితే ఆమె శరీరం పై బుల్లెట్‌ గాయాలు వున్నాయని అదే విధంగా ఒక చేయివిరిగిపోయి వున్నదని ఒంటిపై గాయాలు కూడా వున్నాయని పోలీసులు చెప్పారు. ఈ హత్యకు సంబంధించి ఇంతవరకు ఎవరినీఅరెస్టు చేయలేదని పోలీసులు తెలిపారు. నటాషా అర్ధరాత్రి సమయంలో ఇంటినుంచి బయటకు వెళ్లారని తెలిసింది. ఉదయం ఆరున్నరకు ఆమె శవాన్ని చూసిన వారు పోలీసులకు తెలియజేశారు. నటాషా తన భర్త జగత్‌ సింగ్‌తో ఈ మధ్యనే విడిపోయారు. ఢిల్లీ సోషల్‌ సర్కిల్స్‌లో ఆమెకు మంచిపేరు ప్రఖ్యాతులు వున్నాయి. ఈ మధ్యనే ఆమెతో ఒక హోటల్‌కు వెళ్లి తిరిగివస్తున్న కోకకోలా డైరెక్టర్‌ కపూర్‌ను గుర్తు తెలియని వ్యక్తులు దాడిచేసి తీవ్రంగా కొట్టారు. ఆ సందర్భంగా ఆమె పేరు పత్రికలకు ఎక్కింది.