పరివార్‌ సంబంధాలు మనకెందుకు?

న్యూఢిల్లీ: సంఘ్‌ పరివార్‌తో గల సంబంధాలపై భారతీయ జనతా పార్టీ (బిజెపి)ని జాతీయ ప్రజాస్వామ్య కూటమి (ఎన్‌డిఎ) భాగస్వామ్య పార్టీలు నియంత్రించలేవని రక్షణ మంత్రి, ఎన్‌డిఎ కన్వీనర్‌ జార్జి ఫెర్నాండెజ్‌ అన్నారు. సంఘ్‌ పరివార్‌ వైఖరిని ఆయన దాదాపుగా సమర్థించారు.

చరిత్ర వదిలేసిన సమస్యలు కోర్టులు తీర్చలేవని,అందువల్ల అయోధ్య వివాదాన్ని చర్చల ద్వారా పరిష్కారం చేసుకోవాలని ఆయన అన్నారు. సంఘ్‌ పరివార్‌తో తనకు గల సంబంధాలస్వభావాన్ని బిజెపి నిర్ణయించుకుంటుందని, ఎన్‌డిఎ భాగస్వామ్య పక్షాలుగా తాము ఒక నిర్దిష్ట కార్యక్రమానికి కట్టుబడి ఉన్నామని, కార్యక్రమాన్ని నీరు గార్చకుండా చూసుకోవాల్సిన బాధ్యత మాత్రమే మిత్ర పక్షాలమీద వుంటుందని ఆయన అన్నారు.

సంఘ్‌ పరివార్‌తో బిజెపికి సంబంధాలుండడం అనేది కొత్తవిషయమేమీ కాదని ఆయన అన్నారు. అయోధ్య వివాదం చాలా సంక్లిష్టమైందని, ఇది సాధ్యమైనంత త్వరగా పరిష్కారం కావడానికి మనందరం తలా ఓ చేయి వేయాల్సిన అవసరం ఉన్నదని ఫెర్నాండెజ్‌ అన్నారు.