4న వాజ్‌పేయి గుజరాత్‌ పర్యటన

న్యూఢిల్లీ: ప్రధాని అటల్‌బిహారీ వాజ్‌పేయి ఏప్రిల్‌ 4వ తేదీన గుజరాత్‌లో ఒక రోజు పర్యటన జరిపే అవకాశాలున్నాయి. గోద్రారైలు ఊచకోత అనంతరం చెలరేగిన మత ఘర్షణల వల్ల ఉత్పన్నమైన పరిస్థితిని పరిశీలించేందుకు ఆయన ఈ పర్యటన జరుపుతున్నారు.

గుజరాత్‌ ముఖ్యమంత్రి నరేంద్ర మోడితో బుధవారం జరిగిన సమావేశం నేపథ్యంలో ఈ పర్యటన చేయాలని ప్రధాని నిర్ణయించుకున్నారు. ఏ వర్గం నుంచి కూడా ఫిర్యాదులు రాకుండా శాంతిభద్రతలను కచ్చితంగా అమలు చేయాలని ప్రధాని గుజరాత్‌ ముఖ్యమంత్రిని ఆదేశించారు.

తన ఒక రోజు పర్యటనలో భాగంగా ప్రధాని మతఘర్షణలు జరిగిన కొన్ని ప్రాంతాలను సందర్శించడంతో పాటు కొన్ని రాజకీయ పార్టీల నాయకులతో ఇష్టాగోష్ఠిగా మాట్లాడుతారు.