దామోదర్‌రెడ్డికి వ్యతిరేకంగా కుట్ర

హైదరాబాద్‌ః కాంగ్రెస్‌ నేత రాంరెడ్డి దామోదర్‌రెడ్డి గడిలో జరిగిన పేలుడునుప్రత్యర్ధి వర్గాల కుట్రగా పిసిసి నేత సత్యనారాయణరావు పేర్కొన్నారు. ఈ సంఘటనపై సమగ్రమైన దర్యాప్తు జరిపించాలని గురువారం నాడు పిసిసి కార్యాలయంలో జరిగిన విలేకరుల సమావేశంలో ఆయన డిమాండ్‌ చేశారు.

నల్గొండ జిల్లాలో పెరుగుతున్న కాంగ్రెస్‌ ప్రాబల్యంతో కన్నుకుట్టిన తెలుగుదేశం వర్గాలే ఆయన ఇంట్లో బాంబులుపెట్టారన్న అనుమానం కాంగ్రెస్‌ నేతలు వ్యక్తం చేస్తున్నారు. దామోదర్‌రెడ్డిని అప్రదిష్టపాలు చేసేందుకే ఈ పేలుడు సంఘటనను సృష్టించారని ఎంఎస్‌ఆర్‌ అన్నారు. నిజానిజాలు బయటకు రావలంటే దర్యాప్తు జరిపించాలని ఆయన డిమాండ్‌ చేశారు. నల్గొండ జిల్లాకు చెందిన కాంగ్రెస్‌ నేతలు గురువారం నాడు ఎంఎస్‌ఆర్‌ను కలిసి దామోదర్‌రెడ్డికి వ్యతిరేకంగా ప్రభుత్వం కుట్ర చేస్తున్నదని ఆరోపించారు. దామోదర్‌రెడ్డి కూడా ఇదే అభిప్రాయం వ్యక్తం చేస్తున్నారు. ఇదిలా వుండగా మరోవైపు ఈ పేలుడు సంఘటనకు సంబంధించి దామోదర్‌రెడ్డిఅరెస్టుకు రంగం సిద్ధం చేస్తున్నారు. సంఘటన స్థలాన్ని పరిశీలించిన ఫోరెన్సిక్‌ నిపుణులు ఇచ్చే నివేదిక ఆధారంగా ఆయన్నుఅరెస్టు చేస్తారని అంటున్నారు.