ఎవరైనా ప్రజాసేవ చేయవచ్చు: అక్కినేని

హైదరాబాద్: సినీ నటులు రాజకీయాల్లోకి రాకూడదనేది ఏమీ లేదని, వారు రాజకీయాల్లో రాణించరనేది కూడా నిజం కాదని ప్రముఖ సినీ నటుడు అక్కినేని నాగేశ్వరరావు అన్నారు. ఒక పురస్కార కార్యక్రమంలో పాల్గొన్న ఆయన మీడియా ప్రతినిధులతో మాట్లాడారు. ఎవరైనా ప్రజలకు సేవ చేయవచ్చునని ఆయన అన్నారు. ఎన్టీ రామారావు ముఖ్యమంత్రి అయ్యారని, కృష్ణ, జమున, జగ్గయ్య పార్లమెంటు సభ్యులయ్యారని ఆయన గుర్తు చేశారు. వాళ్ల అభిమానులు వాళ్లకు ఉన్నారని ఆయన చెప్పారు.

తనపై ఒత్తిడి తీవ్రంగానే వచ్చిందని, తాను రాజకీయాల్లోకి రాలేదని, దర్శకత్వం కూడా వహించలేదని, చేత కాక కాదని ఆయన అన్నారు. తాను మొండికేశానని ఆయన చెప్పారు. రాజకీయాలు తెలియక కాదని, తాను చేయాల్సిన పని తనకు ఉన్నదని, ఆ పని కోసం తాను ఇతర వ్యవహారాల్లో తలదూర్చలేదని ఆయన అన్నారు.