వైదొలగండి: కాంగ్రెస్ నేతలకు కెసిఆర్

హైదరాబాద్: తెలంగాణ రాష్ట్రం ఏర్పాటుకు ఈ ప్రాంత కాంగ్రెస్ నాయకులు సోనియాపై ఒత్తిడి తేవాలని, లేదంటే తమ మద్దతు గెలిచిన కాంగ్రెస్ ప్రజాప్రతినిధులు రాజీనామా చేయాలని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు డిమాండ్ చేశారు. రెండో ఎస్సార్సీ వేసే యోచనతో కాంగ్రెస్ తెలంగాణ ప్రజలకు నమ్మక ద్రోహం చేసిందని ఆయన వరంగల్లులో అన్నారు. యాభై ఏళ్ల కిందటి తొలి ఎస్సార్సీని గౌరవిస్తామని చెప్పిన కాంగ్రెస్ ఇప్పుడు ప్రజలను మోసం చేయడానికి సిద్ధపడిందని ఆయన విమర్శించారు. రెండో ఎస్సార్సీ అంటున్న కాంగ్రెస్ కు ప్రజలు గుణపాఠం చెప్పాలని ఆయన కోరారు.

ఎస్సార్సీ వేయడమంటే తెలంగాణ ఇవ్వబోమని చెప్పడమేనని బిజెపి రాష్ట్రాధ్యక్షుడు బండారు దత్తాత్రేయ అన్నారు. తెలంగాణ రాష్ట్రం ఏర్పాటుకు రెండో ఎస్సార్సీ అవసరం లేదని బిజెపి శాసనసభ్యుడు జి. కిషన్ రెడ్డి అన్నారు. ఎస్సార్సీ విషయంలో కాంగ్రెస్ కొండను తవ్వి తొండను పడుతోందని ఆయన వ్యాఖ్యానించారు. రాష్ట్రాన్ని రెండుగా విభజించడానికి తాము సమ్మతమని, ప్రత్యేక రాయలసీమ గురించి తర్వాత ఆలోచిస్తామని ఆయన అన్నారు.