సోనియా చెవిన తప్పులు: ఎమ్మెస్సార్

హైదరాబాద్: తెలంగాణపై రెండో ఎస్సార్సీ వేస్తే కాంగ్రెస్ గతి అంతేనని మాజీ మంత్రి, కాంగ్రెస్ సీనియర్ శాసనసభ్యుడు ఎం. సత్యనారాయణరావు అన్నారు. తెలంగాణపై ఎస్సార్సీ వేయకూడదని, దాని వల్ల తెలంగాణ అంశం పరిష్కారం కాదని ఆయన ఒక ప్రైవేట్ టీవీ చానెల్ కు ఇచ్చిన ఇంటర్వ్యూలో అన్నారు. తెలంగాణ విషయంలో కొందరు తమ పార్టీ నాయకురాలు సోనియా గాంధీని తప్పుదోవ పట్టిస్తున్నారని ఆయన విమర్శించారు. ఆమె చుట్టూ ఉండేవారు, కొంతమంది మంత్రులే ఆ పని చేస్తున్నారని ఆయన అభిప్రాయపడ్డారు.

తెలంగాణపై కాంగ్రెస్ రెండో ఎస్సార్సీ వేస్తారనేది ఊహాగానమేనని ఆయన అన్నారు. ఆ విషయాన్ని ప్రధాని కార్యాలయం ఖండించిందని, వీరప్ప మొయిలీ ఏమన్నారో తాను వినలేదని ఆయన చెప్పారు. తెలంగాణపై తాము త్వరలో సోనియా గాంధీకి విన్నవిస్తామని ఆయన అన్నారు. సాధ్యమైనంత త్వరగా తెలంగాణ రాష్ట్రం ఏర్పాటు చేయాలని ఆయన అభిప్రాయపడ్డారు. సిపియం మినహా అన్ని పార్టీలు తెలంగాణకు అనుకూలంగా ఉన్నాయని ఆయన చెప్పారు. తెలుగుదేశంలో కూడా తెలంగాణకు అనుకూల పరిణామాలు చోటు చేసుకుంటున్నాయని ఆయన చెప్పారు.