విడిపోతేనే మంచిది: వెంకయ్యనాయుడు

విజయవాడ: ఆంధ్రప్రదేశ్ రాష్ట్రం ఎంత త్వరగా వీలైతే అంత త్వరగా రెండుగా విడిపోవడమే మంచిదని భారతీయ జనతా పార్టీ (బిజెపి) సీనియర్ నాయకుడు ఎం. వెంకయ్యనాయుడు అన్నారు. ఆలస్యం జరిగితే రెండు ప్రాంతాలకు నష్టమని ఆయన బుధవారం మీడియా ప్రతినిధులతో అన్నారు. రెండో ఎస్సార్సీ వేయడమంటే తెలంగాణ ఇవ్వడం లేదనేదే అర్థమని ఆయన అన్నారు. తెలంగాణపై రెండో ఎస్సార్సీని తాము స్వాగతిస్తామని తమ పార్టీ నాయకురాలు సుష్మాస్వరాజ్ చేసిన ప్రకటనపై ప్రతిస్పందిస్తూ సమాచార లోపం వల్లనే ఆ ప్రకటన చేశారని ఆయన అన్నారు.

నాలుగేళ్ల తర్వాత కాంగ్రెసుకు ఎస్సార్సీ ఎందుకు గుర్తొచ్చిందని ఆయన అడిగారు. కాంగ్రెస్ ఓటు బ్యాంకు రాజకీయాలకు పాల్పడుతోందని ఆయన విమర్శించారు. తెలంగాణ ఇవ్వకపోతే కాంగ్రెస్ తుడిచి పెట్టుకుపోతుందని ఆయన అన్నారు. తెలంగాణ రాష్ట్ర ఏర్పాటును ఎవరూ ఆపలేరని ఆయన అన్నారు. వచ్చే ఎన్నికల్లో తమ పార్టీ ఒంటరిగానే పోటీ చేస్తామని ఆయన చెప్పారు. ఐక్య ప్రగతిశీల కూటమి (యుపిఎ) పనితీరును సమీక్షిస్తామని, దాని అక్రమాలను బయటపెడతామని ఆయన అన్నారు.