కెసిఆర్ ది పూటకో మాట: బిజెపి

కరీంనగర్: తెలంగాణపై తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు పూటకో మాట మాట్లాడుతున్నారని భారతీయ జనతా పార్టీ (బిజెపి) నాయకుడు సిహెచ్. విద్యాసాగరరావు విమర్శించారు. తెలంగాణ విషయంలో పరిస్థితి ఆశాజనకంగానే ఉందని, అయితే కాంగ్రెస్, తెరాసల వైఖరి వల్ల తెలంగాణ రాష్ట్రం ఏర్పాటులో జాప్యం జరుగుతోందని ఆయన అన్నారు. కరీంనగర్ జిల్లా మెట్ పల్లిలో జరిగిన బహిరంగ సభలో ఆయన బుధవారంనాడు మాట్లాడారు.

శిక్షణా తరతులంటూ చంద్రశేఖరరావు విద్యార్థులను తప్పుదోవ పట్టిస్తున్నారని ఆయన వ్యాఖ్యానించారు. 2004 ఎన్నికల్లో తెరాస, కాంగ్రెస్ నాయకులు పరస్పరం ఒకరి కండువాలు మరొకరు కప్పుకున్నారని, తెలంగాణ రాష్ట్రం ఏర్పాటుకు హామీలు ఇచ్చారని, అధికారం రాగానే ప్రజలను మోసం చేశారని ఆయన అన్నారు. తెలంగాణ అంశం తమ పార్టీ చేతిలోనే ఉందని ఆయన చెప్పారు. తాము ఓడినా గెలిచినా తెలంగాణ ఎజెండాను వదులబోమని ఆయన స్పష్టం చేశారు.