సిఎం హెచ్చరికలు: వెనక్కి తగ్గని నేతలు

న్యూఢిల్లీ/ హైదరాబాద్: కాంగ్రెసులో తెలంగాణ చిచ్చు విపరీతమైన కలకలం రేపుతోంది. తెలంగాణపై మాట్లాడవద్దని ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ, ముఖ్యమంత్రి డాక్టర్ వైయస్ రాజశేఖర రెడ్డి ఢిల్లీలో ప్రకటించారు. అదే సమయంలో తెలంగాణ నాయకులు హైదరాబాదులో ఎమ్మెల్సీ కమలాకర్ రావు ఇంట్లో సమావేశమై తమ వ్యూహాన్ని వినిపించారు. తెలంగాణపై మంత్రులెవరూ మాట్లాడవద్దని, మంత్రులు మాట్లాడితే ముఖ్యమంత్రి మాట్లాడినట్లేనని కిటుకు పెట్టారు. అంతేకాదు, తెలంగాణపై ముఖ్యమంత్రి తన వైఖరి వెల్లడించాలని వారు డిమాండ్ చేశారు. జి. వెంకటస్వామి, ఎం. సత్యనారాయణరావు, మధుయాష్కీ, పాల్వాయి గోవర్దన్ రెడ్డి, ఉప్పునూతల పురుషోత్తమరెడ్డి, సర్వే సత్యనారాయణ వంటి నాయకులు సమావేశమై తన తెలంగాణ వాణిని వినిపించారు. తెలంగాణ భూములను విక్రయించవద్దని కూడా వారు అల్టిమేటం జారీ చేశారు.

తెలంగాణ అంశంపై మంగళవారం సాయంత్రం ముఖ్యమంత్రి డాక్టర్ వైయస్ రాజశేఖర రెడ్డి ఢిల్లీలో వీరప్పమొయిలీతోనూ, పార్టీ అధినేత సోనియా గాంధీతోనూ సమావేశమయ్యారు. తెలంగాణపై సోనియాదే తుది నిర్ణయమని, తాము సోనియా నిర్ణయానికి కట్టుబడి ఉంటామని చెప్పారు. తెలంగాణపై తాము యుపిఎ ఉమ్మడి ప్రణాళికకు కట్టుబడి ఉంటామని, రెండో ఎస్సార్సీతో తెలంగాణకు సంబంధం లేదని, తెలంగాణ అంశాన్ని విడిగానే పరిశీలిస్తామని వీరప్పమొయిలీ ప్రకటన చేసిన తర్వాత కూడా హైదరాబాదులో తెలంగాణ నాయకులు వెనక్కి తగ్గలేదు. మరోవైపు తెలంగాణ రాష్ట్ర సమితి (తెరాస) తన వ్యూహాన్ని మార్చుకుంది. నిరసన సభ నిర్వహించాలనుకున్న తెరాస ఇప్పుడు మూకుమ్మడి రాజీనామాలకు సిద్ధపడుతోంది.