ఎన్టీఆర్ ను తలిస్తే తెలుస్తుంది: అక్కినేని

హైదరాబాద్: ఎన్టీఆర్ చరిత్రను చూసినవారు నటులు రాజకీయాల్లో రాణించలేరనే వ్యాఖ్యలు ఎంత తప్పో అర్థం చేసుకుంటారని ప్రముఖ సినీ నటుడు, దాదా సాహెబ్ ఫాల్కే అవార్డు గ్రహీత అక్కినేని నాగేశ్వరరావు అన్నారు. ఎన్టీఆర్ వర్ధంతి సందర్భంగా ఆయనకు నాగేశ్వరరావు శుక్రవారం నివాళులర్పించారు. రాజకీయాల్లో ఎన్టీఆర్ ప్రభంజనం సృష్టించారని ఆయన కొనియాడారు. తెలుగు వైభవాన్ని ప్రపంచానికి చాటిన ఘనుడు ఎన్టీఆర్ అని ఆయన అన్నారు. తెలియనివారు సినీ నటులు రాజకీయాలకు పనికి రారని అంటారని ఆయన అన్నారు.

ఎన్టీఆర్ కు భారతరత్న ఇవ్వాలని కేంద్ర మంత్రి, ఎన్టీఆర్ కూతురు దగ్గుబాటి పురంధరీశ్వరీ కేంద్రాన్ని కోరారు. ఈ విషయమై తాను ఇదివరకే ప్రధానికి లేఖ రాసినట్లు ఆమె తెలిపారు. రాజకీయాల్లో, సినీ రంగంలో చేసిన సేవలకు ఎన్టీఆర్ కు భారతరత్న ఇవ్వాలని ఆమె అన్నారు. భర్త దగ్గుబాటి వెంకటేశ్వరరావుతో కలిసి ఆమె ఎన్టీఆర్ కు నివాళులర్పించారు. ఎన్టీఆర్ ఆశయసాధనకు కృషి చేస్తామని లక్ష్మీపార్వతి చెప్పారు.