వైయస్ కు బిసి గర్జన భయం: బాబు

హైదరాబాద్: తమ పార్టీ ఈ నెల 23వ తేదీన వరంగల్లులో తలపెట్టిన బిసి గర్జన సదస్సు భయంతోనే ప్రభుత్వం మరో మంత్రి వర్గ ఉపసంఘాన్ని వేసిందని తెలుగుదేశం పార్టీ అధ్యక్షుడు నారా చంద్రబాబు నాయుడు వ్యాఖ్యానించారు. బిసిల కోసం ముఖ్యమంత్రి వైయస్ రాజశేఖర రెడ్డి ప్రభుత్వం చేసిందేమీ లేదని ఆయన సోమవారం మీడియా ప్రతినిధుల సమావేశంలో విమర్శించారు. కాంగ్రెస్ ప్రభుత్వంలో రైతుల, చేనేత కార్మికుల ఆత్మహత్యలు పెరిగాయని ఆయన అన్నారు.

బిసిలకు వైయస్ ప్రభుత్వం అన్యాయం చేసిందని ఆయన విమర్శించారు. బిసి సంక్షేమంపై తమతో చర్చకు రావాలని ఆయన సవాల్ చేశారు. రోశయ్య కమిటీ సిఫార్సుల అమలుకు ఒక్క పైసా కూడా విడుదల చేయలేదని ఆయన విమర్శించారు. నిత్యావసర సరుకుల ధరలు చుక్కలనంటుతున్నాయని, సామాన్యుల జీవితాలు దుర్భరంగా మారుతున్నాయని ఆయన అన్నారు.