కాంగ్రెస్ వారు మిగిలేవారు కాదు: బాబు

అనంతపురం: తాము కాంగ్రెస్ వారి లాగా హింసా రాజకీయాలకు పాల్పడి ఉంటే కాంగ్రెస్ నాయకులు మిగిలి ఉండేవారు కాదని తెలుగుదేశం పార్టీ అధ్యక్షుడు నారా చంద్రబాబునాయుడు అన్నారు. తొమ్మిదేళ్లు ముఖ్యమంత్రిగా ఉన్న తాను అదే విధంగా ఆలోచించి ఉంటే కాంగ్రెస్ నాయకులు ఉండేవారు కాదని ఆయన అన్నారు. తమ పార్టీ శాసనసభ్యుడు పరిటాల వర్ధంతి సభలో ఆయన గురువారంనాడు మాట్లాడారు. పరిటాల రవిని అత్యంత నీచంగా కాంగ్రెస్ వారు పొట్టన పెట్టుకున్నారని ఆయన అన్నారు. ఈ సందర్భంగా ఆయన పరిటాల రవి పేర ఏర్పాటైన వెబ్ సైటును ప్రారంభించారు.

అనంతపురం జిల్లా వెంకటాపురంలో పరిటాల రవి వర్ధంతి సభ ఏర్పాటైంది. ఈ సభకు పెద్ద యెత్తున తరలి వచ్చారు. పరిటాల అభిమానులు వేదిక వైపుకు తోసుకు రావడంతో తొక్కిసలాట చోటు చేసుకుంది. దీంతో 20 మంది దాకా స్పృహ తప్పి పడిపోయారు. శాసనసభ్యురాలు, పరిటాల రవి సతీమణి పరిటాల సునీత సభకు తరలివచ్చినవారికి పదే పదే విజ్ఞప్తి చేశారు.