తెలంగాణ ఇవ్వాలా, వద్దా: రాహుల్

న్యూఢిల్లీ: తెలంగాణ ఇవ్వాలా, వద్దా అని కాంగ్రెస్ అధ్యక్షురాలు సోనియా గాంధీ కుమారుడు, ఎఐసిసి ప్రధాన కార్యదర్శి రాహుల్ గాంధీ తెలంగాణ రాష్ట్ర సమితి (తెరాస) మాజీలను అడిగారు. తెలంగాణ ఇస్తే కాంగ్రెసుకు నష్టమా, లాభమా అని కూడా ఆయన అడిగారు. తెరాస నుంచి వైదొలిగి కాంగ్రెసులో చేరిన తెరాస అధ్యక్షుడు కె. చంద్రశేఖర రావు మేనల్లుడు ఉమేష్ రావుతో పాటు ఐదుగురు మంగళవారంనాడు రాహుల్ గాంధీని కలిసి వినతిపత్రం సమర్పించారు. అయితే తాము ఇవ్వాలని గానీ, ఇవ్వవద్దని గానీ చెప్పలేదని ఉమేష్ రావు చెప్పారు.

తెలంగాణ సెంటిమెంటు కొన్ని ప్రాంతాలకు మాత్రమే పరిమితమని వారు రాహుల్ గాంధీతో చెప్పారు. ముఖ్యమంత్రి వైయస్ రాజశేఖర రెడ్డి తెలంగాణలో గతంలో ఎన్నడూ లేని విధంగా అభివృద్ధి కార్యక్రమాలు చేపట్టారని వారు రాహుల్ కు చెప్పారు. తెలుగుదేశం పార్టీ అధ్యక్షుడు నారా చంద్రబాబునాయుడు ప్రభుత్వ హయాంలో తెలంగాణకు అన్యాయం జరిగిందని వారు చెప్పారు. తాము కెసిఆర్ నియంతృత్వం నచ్చక తెరాస నుంచి వైదొలిగి కాంగ్రెసులో చేరామని వివరణ ఇచ్చుకున్నారు. తెలంగాణపై పార్టీ అధిష్టానవర్గం నిర్ణయానికి కట్టుబడి ఉంటామని వారు చెప్పారు.