మార్గదర్శి కేసు విచారణ వాయిదా

న్యూఢిల్లీ: ఈనాడు గ్రూప్ సంస్థల అధినేత రామోజీరావు నేతృత్వంలోని మార్గదర్శి చిట్‌ఫండ్స్ కేసు విచారణను సుప్రీంకోర్టు మార్చి 27కు వాయిదా వేసింది. మార్గదర్శి దాఖలు చేసిన అఫిడవిట్‌పై సమాధానానికి ప్రభుత్వ న్యాయవాది గడువు కోరడంతో ప్రధాన న్యాయమూర్తి జస్టిస్ బాలకృష్ణన్ నేతృత్వంలోని బెంచ్ దానిని వాయిదా వేసింది. డిపాజిటర్లందరికీ డిపాజిట్లను తిరిగి చెల్లిస్తున్నందున తమ సంస్థ ఆస్తుల జప్తు, అకౌంట్ల స్తంభనపై స్టే విధిస్తూ గతంలో ఇచ్చిన ఉత్తర్వులను ఎత్తివేయాలని మార్గదర్శి కోరింది.

డిపాజిటర్లకు డబ్బులు చెల్లించేందుకు నిర్ణయిస్తూ పత్రికల్లో ప్రకటనలు కూడా చేశామని చెబుతూ వాటికి సంబంధించిన ప్రతులను సైతం ఆ సంస్థ కోర్టులో ప్రవేశపెట్టింది. అయితే ఆ అఫిడవిట్‌పై సమాధానం ఇచ్చేందుకు కొంత గడువు కావాలని కోరడంతో కోర్టు విచారణను వాయిదా వేసింది.