సోనియా హైదరాబాద్ సభ రద్దు

హైదరాబాద్: కాంగ్రెస్ అధ్యక్షురాలు, యుపిఎ చైర్ పర్సన్ సోనియా గాంధీ హైదరాబాద్ బహిరంగ సభ రద్దయింది. ఈ నెల 14వ తేదీ సాయంత్రం సికింద్రాబాదులోని పరేడ్ గ్రౌండ్స్ లో భారీ యెత్తున సోనియా గాంధీ బహిరంగ సభను తలపెట్టారు. అయితే ఈ సభ ఎందుకు రద్దయిందనే విషయంపై కాంగ్రెస్ నుంచి అధికారిక ప్రకటన వెలువడలేదు. సోనియా సభ రద్దుపై మాట్లాడడానికి ముఖ్యమంత్రి డాక్టర్ వైయస్ రాజశేఖర రెడ్డి నిరాకరించారు. నో కామెంట్ అంటూ ఆయన శాసనసభ ఆవరణలో వెళ్లిపోయారు. అయితే సోనియా సభ రద్దుపై వివిధ ఊహాగానాలు ప్రచారమవుతున్నాయి.

సోమవారంనాడు తెలంగాణ రాష్ట్ర సమితి (తెరాస) లోకసభ సభ్యులు రాజీనామా చేయడం, రేపు తెరాస శాసనసభ్యులు, ఎమ్మెల్సీలు రాజీనామా చేస్తుండడం, తెలంగాణపై కాంగ్రెస్ వైఖరికి నిరసనగా సోనియా పర్టన సందర్భంగా బిజెపి బంద్ కు పిలుపు ఇవ్వడం ఈ సభ రద్దుకు కారణమని భావిస్తున్నారు. తాజా పరిణామాల నేపథ్యంలో తెలంగాణపై ఏ నిర్ణయమూ తీసుకోకుండా హైదరాబాదులో సోనియా సభ జరగడం సరి కాదని కాంగ్రెస్ అధిష్ఠానవర్గం భావించినట్లు చెబుతున్నారు.

ఈ నెల 14వ తేదీన సోనియా మొదట తూర్పు గోదావరి జిల్లాలోని పుష్కర ప్రాజెక్టుకు శ్రీకారం చుడతారు. అనంతరం జక్కంపేటలో బహిరంగ సభ జరుగుతుంది. ఆ తర్వాత దేవాదుల, పోలవరం ప్రాజెక్టు పనులను పరిశీలిస్తారు. అనంతరం హైదరాబాదులోని శంషాబాద్ అంతర్జాతీయ విమానాశ్రయాన్ని ప్రారంభిస్తారు. ఈ కార్యక్రమం తర్వాత సోనియా బహిరంగ సభ జరగాల్సి ఉండింది. ఈ సభ మాత్రం రద్దయింది.