మహేష్, చార్మీ ఇళ్లపై ఐటి దాడులు

హైదరాబాద్: సినీ ప్రముఖుల ఇళ్లపై ఆదాయం పన్ను శాఖ అధికారులు మంగళవారం దాడులు నిర్వహించారు. మంగళవారం మధ్యాహ్నం తర్వాత కూడా సినీ ప్రముఖుల ఇళ్లలో ఐటి అధికారులు సోదాలు నిర్వహిస్తూనే ఉన్నారు. సూపర్ స్టార్ మహేష్ బాబు, ప్రముఖ నటి చార్మి ఇళ్లలో ఐటి అధికారులు ఒకేసారి సోదాలు నిర్వహించారు. అలాగే ప్రముఖ దర్శకులు వివి వినాయక్, ఎస్ ఎస్ రాజమౌళి ఇళ్ల కూడా సోదాలు జరిగాయి. చూపిన ఆదాయం కన్నా ఎక్కువ ఆస్తులు కలిగి ఉన్నారనే ఆరోపణలపై ఈ సోదాలు జరిగాయి.

మహేష్ బాబు సినిమాకు 8 కోట్ల రూపాయలు తీసుకుంటున్నాడనే వార్తలు వెలువడిన నేపథ్యంలో ఈ ఐటి అధికారుల దాడులు జరిగాయి. మహేష్ బాబు కుటుంబం కాంగ్రెసుకు సన్నిహితం. అయినా మహేష్ బాబు ఇల్లు సోదాకు ప్రభుత్వం అనుమతి ఇవ్వడం ఆశ్చర్యపరుస్తోంది. సికింద్రాబాదులోని రాష్ట్రపతి రోడ్డులో గల ప్రముఖ నిర్మాత దిల్ రాజు కార్యాలయాల్లో కూడా సోదాలు జరిగాయి. ఈ సోదాలపై సినీ ప్రముఖులు, ఐటి అధికారులు నిరాకరిస్తున్నారు. ఈ సోదాల్లో అధికారులు పత్రాలను, సర్టిఫికెట్లను పరిశీలిస్తున్నారు. ఆర్థిక సంవత్సరాంతంలో ఇటువంటి దాడులు జరగడం సాధారణం. నిరుడు పూరీ జగన్నాధ్, తదితరుల ఇళ్లపై ఐటి దాడులు జరిగాయి.