ఒరిస్సా తర్వాత ఆంధ్ర: రాహుల్

విశాఖపట్నం: భారత యాత్రలో భాగంగా ఎఐసిసి ప్రధాన కార్యదర్శి రాహుల్ గాంధీ శుక్రవారం ఆంధ్రప్రదేశ్ లోని విశాఖపట్నంలో కాలు మోపారు. ఒరిస్సాలోని కలహండి నుంచి ఆయన తన భారత యాత్రను ప్రారంభించనున్నారు. కలహిండికి చేరుకోవడానికి ముందు ఆయన విశాఖపట్నంలో దిగారు. విశాఖపట్నంలో ఆయనకు ఘనస్వాగతం లభించింది. రాష్ట్ర ప్రభుత్వ సలహాదారు, ముఖ్యమంత్రి డాక్టర్ వైయస్ రాజశేఖర రెడ్డి ఆంతరంగికుడు కెవిపి రామచంద్రరావు, కేంద్ర మంత్రి టి. సుబ్బిరామి రెడ్డి ఆయన స్వాగతం చెప్పారు.

ఒరిస్సా పర్యటన తర్వాత ఆంధ్రప్రదేశ్ పర్యటనకు వస్తానని రాహుల్ గాంధీ ఆంధ్ర నాయకులకు హామీ ఇచ్చారు. రాష్ట్ర రాజకీయ పరిస్థితుల గురించి, ప్రత్యేక తెలంగాణ నినాదం గురించి ఆంధ్రప్రదేశ్ నాయకులు రాహుల్ గాంధీకి వివరించారు. ఎస్పీజి హెలికాప్టర్ లో సాంకేతిక లోపాలు ఏర్పడడం వల్ల రాహుల్ ఒరిస్సా పర్యటనలో కాస్తా జాప్యం జరిగింది. రాహుల్ గాంధీ నాయనమ్మ ఇందిరా గాంధీ తన చివరి ప్రసంగం ఒరిస్సాలోని భువనేశ్వర్ లో చేశారు. తమిళనాడులోని శ్రీపెరంబదూర్ లో హత్యకు గురికావడానికి ముందు ఆయన తండ్రి రాజీవ్ గాంధీ ఒరిస్సాలో పర్యటించారు. దీంతో రాహుల్ గాంధీ తన భారత పర్యటనను ఒరిస్సా నుంచి ప్రారంభించాలనుకోవడంలో ఆ భావోద్వేగం పనిచేస్తోంది. ఒరిస్సాలో నాలుగు రోజుల పాటు ఆయన 13 కార్యక్రమాల్లో పాల్గొంటారు.