ఏకపక్షంగా మావోయిస్టుల హతం: వివి

హైదరాబాద్: ఖమ్మం జిల్లా చర్ల మండలంలో జరిగిన మావోయిస్టుల ఎన్ కౌంటర్ ను విప్లవ రచయితల సంఘం (విరసం) నాయకుడు వరవరరావు ఖండించారు. ఈ ఎన్ కౌంటర్ బూటకమని ఆయన మంగళవారం మీడియా ప్రతినిధులతో అన్నారు. కేంద్ర, రాష్ట్ర ప్రభుత్వాల కుట్రలో భాగంగానే ఈ ఎన్ కౌంటర్ జరిగిందని ఆయన అన్నారు. ప్లీనరీ జరుగుతోందని తెలిసి దాడి చేసి మావోయిస్టులను చంపడం అనైతికమని ఆయన అన్నారు.

అగ్రనాయకత్వం ఉందని తెలిసి ఉద్దేశ్యపూర్వకంగానే కుట్రపూరితంగా మావోయిస్టులను హతమార్చారని ఆయన విమర్శించారు. ఎదురుకాల్పులు జరగలేదని, ఏకపక్షంగా కాల్పులు జరిపి మావోయిస్టులను హతమార్చారని ఆయన అన్నారు. ఎదురుకాల్పులు జరిగితే పోలీసులకూ నష్టం వాటిల్లాలి కదా అని ఆయన అన్నారు. కోర్టులో విచారణ జరుగుతున్న సమయంలో ఎన్ కౌంటర్ చేయడం చట్టాన్ని ఉల్లంఘించడమేనని ఆయన అన్నారు.