పురంధరేశ్వరిపైనా పోరు: హరికృష్ణ

న్యూఢిల్లీ: తన తండ్రి స్వర్గీయ ఎన్టీ రామారావు ఆశయాల సాధన కోసం తన చెల్లెలు పురంధరేశ్వరిపై కూడా పోరాటం చేస్తామని తెలుగుదేశం పార్టీ రాజ్యసభ సభ్యుడు నందమూరి హరికృష్ణ చెప్పారు. ఎన్టీ రామారావు కుమారుడిగా తనకు రాజ్యసభ సీటు దక్కలేదని, పార్టీ కార్యకర్తగా తనకు ఈ సీటు దక్కిందని ఆయన చెప్పారు. రాజ్యసభ సభ్యుడిగా ఆయన బుధవారంనాడు ప్రమాణం చేశారు. తనను రాజ్యసభకు ఎంపిక చేయాలనేది పార్టీ అధ్యక్షుడు నారా చంద్రబాబునాయుడు ఒక్కరి నిర్ణయం కాదని, పార్టీకి చెందిన అందరూ కలిసి తన అభ్యర్థిత్వాన్ని ఖరారు చేశారని ఆయన చెప్పారు.

తమ పార్టీ అధ్యక్షుడు నారా చంద్రబాబునాయుడుని గద్దె ఎక్కించే వరకు తాను విశ్రమించబోనని ఆయన చెప్పారు. తన క్రమశిక్షణ వల్లనే తనకు రాజ్యసభ సీటు వచ్చిందని ఆయన చెప్పారు. తాను ఢిల్లీకి రావడం ఇది మూడవ సారి అని ఆయన చెప్పారు. నాదెండ్ల భాస్కరరావుతో కాంగ్రెస్ తన తండ్రి ఎన్టీ రామారావును వెన్నుపోటు పొడిచినప్పుడు జరిగిన ఆందోళనలో భాగంగా ఇక్కడికి వచ్చానని, రెండో సారి రథసారధిగా హర్యానా ఎన్నికల్లో ఎన్టీ రామారావు ప్రచారం కోసం వచ్చానని, ఇది మూడవ సారి అని ఆయన చెప్పారు.