యాత్రతో కాంగ్రెసులో గుబులు: బాబు

చిత్తూరు: తన చైతన్య యాత్ర అనంతరం రూపొందించే విధానాలు దేశ రాజకీయాల్లోనే పెను మార్పులు తెస్తాయని తెలుగుదేశం పార్టీ అధ్యక్షుడు నారా చంద్రబాబునాయుడు చెప్పారు. మీకోసం చైతన్యయాత్రను ఆయన రెండో రోజు మంగళవారం కొనసాగించారు. ప్రజల కష్టాలను, అవసరాలను తెలుసుకుని అందుకు అనుగుణంగానే తాము 2009 ఎన్నికల ప్రణాళికను రూపొందిస్తామని ఆయన చెప్పారు. నిత్యావసర సరుకుల ధరల పెరుగుదలతో సామాన్యుల కష్టాలు పెరిగాయని ఆయన అన్నారు.

తన యాత్రకు లభిస్తున్న స్పందనను చూసి కాంగ్రెస్ నాయకులకు భయం పట్టుకుందని ఆయన అన్నారు. తన యాత్రలో ప్రజల కష్టాలను తెలుసుకుని వాటి పరిష్కారానికి తోడ్పడేలా తమ విధానాలను రూపొందించుకుంటామని ఆయన చెప్పారు. కాంగ్రెస్ పాలనలో సామాన్యుల కష్టాలు పెరిగాయని ఆయన అన్నారు. కాంగ్రెస్ ప్రభుత్వంపై ఆయన తీవ్రంగా ధ్వజమెత్తారు.