లెఫ్ట్ నేతలతో చిరు హితుడి చర్చలు

హైదరాబాద్: ఉభయ కమ్యూనిస్టు పార్టీల నాయకులతో మెగాస్టార్ చిరంజీవి సన్నిహితుడు డాక్టర్ మిత్రా మంగళవారం ఉదయం మంతనాలు జరిపారు. చిరంజీవ సూచన మేరకే ఈ మంతనాలు జరిగినట్లు భావిస్తున్నారు. సిపిఎం రాష్ట్ర కార్యదర్శి బి.వి. రాఘవులును మిత్రా ఆయన కార్యాలయంలో కలిసి ముచ్చటించారు. కాగా విజయవాడలో ఉన్న సిపిఐ కార్యదర్శి కె. నారాయణతో మిత్రా ఫోనులో మాట్లాడారు. మిత్రా దివంగత సిపిఎం నాయకుడు పుచ్చలపల్లి సుందరయ్య సోదరుడి కుమారుడు. చిరంజీవి మామ స్వర్గీయ అల్లు రామలింగయ్య కమ్యూనిస్టు పార్టీకి చెందిన ప్రజా నాట్య మండలిలో పనిచేశారు. ఈ రీత్యా చిరంజీవి కుటుంబానికి, వామపక్షాలకు మధ్య సన్నిహిత సంబంధాలు ఉన్నాయి.

మిత్రతో జరిగిన చర్చలకు ప్రాధాన్యం లేదని బి.వి. రాఘవులు చెప్పారు. అయితే రాజకీయాలు మాత్రం చర్చించామని ఆయన మీడియా ప్రతినిధులతో అన్నారు. రాష్ట్రంలో మూడో ప్రత్యామ్నాయానికి చిరంజీవి సిద్ధంగా ఉన్నారని మిత్రా రాఘవులుకు, నారాయణకు తెలియజేసినట్లు సమాచారం. చిరంజీవి రాజకీయాల్లోకి వస్తారా అని రాఘవులు అడిగారట. రాజకీయాల్లోకి వచ్చి చిరంజీవి తన విధానాలను ప్రకటించిన తర్వాత, ఆ విధానాలను బట్టి కలిసి పని చేసే విషయాన్ని ఆలోచిస్తామని రాఘవులు మిత్రాతో చెప్పినట్లు సమాచారం. ఉప ఎన్నికల తర్వాత చిరంజీవి తన పార్టీని ప్రకటించే అవకాశం ఉంది. చిరంజీవి పార్టీ ఎజెండాలో కమ్యూనిస్టు సిద్ధాంతాల మూలాలు ఉన్నట్లు చెబుతున్నారు. ఉప ఎన్నికల్లో తెలుగుదేశం పార్టీతో వామపక్షాల పొత్తును నివారించేందుకు మిత్రా కమ్యూనిస్టు పార్టీల నాయకులతో చర్చించినట్లు సమాచారం. ఇప్పుడు తెలుగుదేశం పార్టీతో పొత్తు పెట్టుకుంటే చిరంజీవి పార్టీ పెట్టిన తర్వాత తెగదెంపులు చేసుకోవడం కష్టమవుతుందని ఆయన చెప్పినట్లు తెలుస్తోంది.