చిరంజీవిపై చర్చించలేదు: రాఘవులు

హైదరాబాద్: డాక్టర్ మిత్రాతో తాము మెగాస్టార్ చిరంజీవి రాజకీయాలపై చర్చలు జరపలేదని సిపిఎం రాష్ట్ర కార్యదర్శి బి.వి. రాఘవులు చెప్పారు. చిరంజీవి రాజకీయ సలహాదారు కాకముందు నుంచే మిత్రా తనకు మిత్రుడని ఆయన మంగళవారం మీడియా ప్రతినిధుల సమావేశంలో అన్నారు. తన ఆరోగ్యం బాగా లేదని తెలిసి తనను పరామర్శించడానికి మిత్రా వచ్చారని ఆయన స్పష్టం చేశారు. మిత్రా తనను వ్యక్తిగత హోదాలోనే కలిశారని, తమ భేటీకి రాజకీయాలతో సంబంధం లేదని ఆయన చెప్పారు.

రాజకీయ ప్రవేశంపై చిరంజీవి ప్రకటన చేయాల్సిందేనని, చిరంజీవి ప్రకటన వెలువడిన తర్వాత తమ విధానాన్ని చెప్తామని ఆయన అన్నారు. చిరంజీవి పార్టీ ఎప్పుడు పెడ్తారు, పెడ్తే ఏం చేస్తారు అనే విషయాలు మిత్రాతో చర్చకు రాలేదని ఆయన చెప్పారు. చిరంజీవి పార్టీ గురించి ప్రకటించే వరకు సర్దుబాట్లు, పొత్తులు, సంఘీభావాలు ఎవీ చర్చకు రాబోపని ఆయన చెప్పారు. సిపిఐతో మిత్రా చిరంజీవి రాజకీయాల గురించి చర్చించిన విషయం తనకు తెలియదని ఆయన అన్నారు.