బెల్టు షాపులు రద్దు చేస్తాం: బాబు

హైదరాబాద్: తాము అధికారంలోకి వస్తే బెల్టు షాపులను రద్దు చేస్తామని తెలుగుదేశం పార్టీ అధ్యక్షుడు నారా చంద్రబాబునాయుడు హామీ ఇచ్చారు. మీ కోసం చైతన్యయాత్రలో భాగంగా ఆయన రాత్రి నెల్లూరు జిల్లాలోని ఒక గ్రామంలో బస చేసి, బుధవారం ఉదయం రచ్చబండ నిర్వహించారు. బెల్టు షాపుల ద్వారా, చీప్ లిక్కర్ ద్వారా ప్రభుత్వం 25 వేల కోట్ల నుంచి 30 వేల కోట్ల రూపాయల మేరకు ఆదాయం సమకూర్చుకుంటోందని, దీని వల్ల పేదల కుటుంబాలు ఆర్థికంగా చితికిపోతున్నాయని ఆయన అన్నారు. మౌలిక సదుపాయాలు కల్పించడంలో ప్రభుత్వం విఫలమైందని ఆయన విమర్శించారు.

తన యాత్రలో స్థానిక సమస్యల అధ్యయనానికి ప్రాధాన్యం ఇస్తానని ఆయన చెప్పారు. సోమశిల ప్రాజెక్టు నీటిని కడప, అనంతపురం జిల్లాల్లోని పరిశ్రమలకు తరలించేందుకు ముఖ్యమంత్రి డాక్టర్ వైయస్ రాజశేఖర్ రెడ్డి ప్రయత్నిస్తున్నారని, ఆ ప్రయత్నాన్ని అడ్డుకుంటామని ఆయన చెప్పారు. నెల్లూరు జిల్లాలో ఆయన చైతన్య యాత్ర సాగుతోంది.