తెరాస ఎన్నికల తమాషా: బాబు

గుంటూరు: ఎన్నికలంటే తెలంగాణ రాష్ట్ర సమితి (తెరాస)కి తమాషాగా మారిందని తెలుగుదేశం పార్టీ అధ్యక్షుడు నారా చంద్రబాబునాయుడు వ్యాఖ్యానించారు. రాజీనామాల ద్వారా ఉప ఎన్నికలను ఆహ్వానించి ప్రజా దుర్వినియోగానికి తెరాస కారణమవుతోందని ఆయన అన్నారు. మీ కోసం యాత్రలో ఉన్న నారా చంద్రబాబు నాయుడు పిడుగురాళ్లలో గురువారం మీడియా ప్రతినిధుల సమావేశంలో మాట్లాడారు. తెలంగాణపై కాంగ్రెసు, తెరాసలు నాటకాలు ఆడుతున్నాయని ఆయన వ్యాఖ్యానించారు. ఉప ఎన్నికల దృష్ట్యా మహానాడును వాయిదా వేసినట్లు ఆయన తెలిపారు. తెలంగాణపై తాము ప్రజాభిప్రాయాన్ని తెలుసుకుంటున్నామని ఆయన చెప్పారు. తెలంగాణకు తాము వ్యతిరేకం కాదని ఆయన మరోసారి స్పష్టం చేశారు. కాంగ్రెస్ ప్రజలను మోసం చేసిందని ఆయన విమర్శించారు.

తెలంగాణపై తాము వేసిన కమిటీ నివేదిక సమర్పించిన తర్వాత తగిన సమయంలో తగిన నిర్ణయం తీసుకుంటామని ఆయన చెప్పారు. వెనుకబడిన ప్రాంతాల అభివృద్దికి తాము ఎంతో కృషి చేశామని ఆయన చెప్పారు. వెనకబడిన ప్రాంతాల్లో తాము నిధులు అధికంగా ఖర్చు చేశామని ఆయన చెప్పారు. తమ పట్ల ప్రజలకు విశ్వసనీయత ఉందని ఆయన చెప్పారు. డబ్బులు విపరీతంగా ఖర్చు పెట్టి, అధికార దుర్వినియోగానికి పాల్పడి, ప్రతిపక్షాల నాయకలనూ కార్యకర్తలనూ కొని కాంగ్రెస్ పార్టీ ఉప ఎన్నికల్లో గెలవడానికి ప్రయత్నిస్తోందని ఆయన విమర్శించారు. కాంగ్రెసు తీరుపై రాజీ లేని పోరాటం చేస్తామని ఆయన చెప్పారు.