సింహాచలంలో స్వామి చందనోత్సవం

సింహాచలం: సింహాచలంలో వెలిసిన వరాహ లక్ష్మీ నరసింహస్వామి చందనోత్సవానికి ఘనంగా ఏర్పాట్లు చేస్తున్నారు. వైశాఖ శుద్ధ తదియ రోజైన గురువారం జరిగే ఈ ఉత్సవాలకు పెద్ద సంఖ్యలో భక్తులు హాజరయ్యే అవకాశమున్నందున అందుకు తగ్గట్టు ఏర్పాట్లు చేస్తున్నామని వెల్లడించారు. దీనికోసం ఆలయ వంటశాలలో దాదాపు లక్ష లడ్డూల తయారు చేస్తున్నామని అధికారులు తెలిపారు. అలాగే రోజుకు 15 వేల చొప్పున పులిహోర ప్యాకెట్లను కూడా సిద్ధం చేస్తున్నామన్నారు.

చందనయాత్రలో భాగంగా రాత్రి ఒంటి గంటకు స్వామి వారిని నిద్రలేపి, చందనాన్ని తొలగిస్తారు. వెండి కలశాలలో తీసుకువచ్చిన గంగాజలంతో వైష్ణవులు స్వామివారికి అభిషేకం చేయించి నిజరూపంలోకి తీసుకువస్తారు. ఏడాదిలో ఈ ఒక్కరోజు మాత్రమే భక్తులకు స్వామి వారు నిజరూప దర్శనం అందిస్తున్నారు.