కాంగ్రెస్ మహిళా పదవికి ఒకె: జీవిత

తిరుపతి: మహిళా కాంగ్రెస్ అధ్యక్షురాలి పదవి ఇస్తే తీసుకుంటానని ప్రముఖ సినీ నటి, హీరో రాజశేఖర్ సతీమణి జీవిత అన్నారు. రాజశేఖర్, జీవిత దంపతులు మంగళవారం తిరుమల శ్రీవారిని దర్శించుకున్నారు. ప్రజలకు సేవ చేయడానికి రాజకీయాలనేవి ఒక వేదిక అని ఆమె అన్నారు. పార్టీ ఏదైనా ప్రజలకు ఎంతో కొంత సేవ చేయడమే తన లక్ష్యమని ఆమె చెప్పారు. చేరితే రాజకీయంగా పరిణతి చెందిన పార్టీలోనే చేరుతానని ఆమె అన్నారు. రాజకీయాలు అంటరానివతి తాము భావించడం లేదని ఆమె అన్నారు. తాను మహిళా కాంగ్రెస్ అధ్యక్షురాలిని అయిపోయినట్లుగానే ఉందని, ఆ పదవి ఇస్తే తీసుకోవడానికి సిద్ధంగా ఉన్నానని ఆమె చెప్పారు.

గత కొంత కాలంగా రాజశేఖర్, జీవిత దంపతులు కాంగ్రెసుకు దగ్గరైన విషయం తెలిసిందే. చిరంజీవితో జరిగిన గొడవలోనూ ఈ కోణం ఉంది. ఇటీవల జీవిత ముఖ్యమంత్రి డాక్టర్ వైయస్ రాజశేఖర రెడ్డిని కలిశారు. రాజశేఖర్ హీరోగా వస్తున్న సత్యమేవ జయతే సినిమా షూటింగ్ ప్రారంభోత్సవానికి ఆమె ముఖ్యమంత్రిని ఆహ్వానించారు. అందుకు రాజశేఖర రెడ్డి అంగీకరించినట్లు సమాచారం. రాజశేఖర్ వచ్చే ఎన్నికల్లో కాంగ్రెసు తరఫున పోటీ చేసే అవకాశం ఉందని వార్తలు వస్తున్నాయి.