చిరు పార్టీ మహిళల రహస్య సమావేశం

హైదరాబాద్: మెగాస్టార్ చిరంజీవి రాజకీయ పార్టీ కోసం హైదరాబాదులో మంగళవారం మహిళా వారధి పేరుతో ఒక రహస్య సమావేశం ఏర్పాటు చేశారు. ఈ సమావేశం మూడు రోజుల పాటు జరుగుతుందని తెలుస్తోంది. మండల స్థాయిల్లో నిర్వహించిన సమావేశాల్లో చురుకైన వారిని 200 మందిని ఎంపిక చేసి ఈ సమావేశం ఏర్పాటు చేశారు. వారికి మూడు రోజుల పాటు వివిధ అంశాల్లో అవగాహన కల్పిస్తారు. వివిధ సామాజిక వర్గాలకు చెందిన వారిని ఇందుకు ఎంపిక చేశారు.

సమావేశం ఎజెండా గురించి ఎవరూ ఏమీ మాట్లాడడం లేదు. ఈ సమావేశంలో పాల్గొంటున్నవారిలో న్యాయవాదులు, వైద్యులు, ఉన్నత విద్యనభ్యసించినవారు ఉన్నారు. డాక్టర్ మిత్రా, వినయ్ వంటివారు పాఠాలు చెబుతున్నట్లు సమాచారం. చిరంజీవి పార్టీ కోసం మహిళా విభాగాన్ని ఏర్పాటు చేసే క్రమంలో ఈ సమావేశం నిర్వహించినట్లు తెలుస్తోంది.