పేదలకు 3 సెంట్ల భూమి: బాబు

హైదరాబాద్: తాము అధికారంలోకి వస్తే నగరాలు, పట్టణాల్లో పేదలకు సొంత ఇంటి నిర్మాణం కోసం మూడు సెంట్ల భూమి ఇస్తామని తెలుగుదేశం పార్టీ అధ్యక్షుడు నారా చంద్రబాబునాయుడు హామీ ఇచ్చారు. హైదరాబాదులోని ముషిరాబాద్ శాసనసభా నియోజకవర్గంలో ఆయన బుధవారంనాడు సిపిఎం అభ్యర్థి ఎస్. వీరయ్య తరఫున ప్రచారం చేసారు. ముషీరాబాద్ నియోజకవర్గంలోని బస్తీల్లో, కూడళ్లలో ఆయన రోడ్ షో నిర్వహించారు. పేద, మధ్యతరగతి వారి సొంత ఇంటి కలను నిజం చేస్తామని ఆయన చెప్పారు.

నగరంలోని ప్రజల మంచినీరు, కరెంట్ వంటి సమస్యలను కాంగ్రెసు పరిష్కరించలేదని, తెలుగుదేశం ప్రభుత్వ హయాంలోనే అది సాధ్యమని ఆయన అన్నారు. తాము అధికారంలోకి వస్తే సంక్షేమ, అభివృద్ధి కార్యక్రమాలకు సమ ప్రాధాన్యం ఇస్తామని ఆయన చెప్పారు. కాంగ్రెస్ అధికారంలోకి వచ్చిన నాలుగేళ్లలో నగరాలు, పట్టణాల్లోని పేదలకు ఇళ్లు కట్టించలేదని, భూములను మాత్రం వేలం వేస్తూ పెద్దలకు కట్టబెడుతోందని ఆయన విమర్శించారు.