కెసిఆర్ లో అభద్రత భావం: మొయిలీ

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు అభద్రతా భావంతో ఉన్నారని కాంగ్రెస్ పార్టీ ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ అన్నారు. వైయస్ రాజశేఖర రెడ్డిని ముఖ్యమంత్రి పదవి నుంచి దించుతారని అనడానికి చంద్రశేఖరరావు ఎవరని ఆయన బుధవారం మీడియా ప్రతినిధుల సమావేశంలో ప్రశ్నించారు. ఎఐసిసి ప్రతినిధులతో మాట్లాడినట్లు చంద్రశేఖరరావు చేసిన ప్రకటన అబద్ధమని ఆయన అన్నారు. నాయకత్వ మార్పు గురించి మాట్లాడే అధికారం తనకు మాత్రమే వుందని, కెసిఆర్ తో ఎవరు మాట్లాడారో తెలియదని ఆయన అన్నారు. అభద్రతా భావంతోనే కెసిఆర్ అలా మాట్లాడుతున్నారని, కాంగ్రెస్ సాయం కోసం కెసిఆర్ ఎదురు చూస్తున్నట్లున్నారని ఆయన అన్నారు.

రాష్ట్రంలో నాయకత్వ మార్పు ఉండదని ఆయన స్పష్టం చేశారు. వ్యక్తిగత లక్ష్యం కోసం కెసిఆర్ ఉప ఎన్నికలు తెచ్చారని ఆయన విమర్శించారు. 2009లో సాధారణ ఎన్నికలు వస్తుండగా ఇప్పుడు ఉప ఎన్నికల అవసరం ఏమిటని ఆయన అడిగారు. కెసిఆర్ నిర్లక్ష్య ధోరణితో వ్యవహరిస్తున్నారని, ఇది వరకు ఒకసారి కరీంనగర్ లోకసభ ఉప ఎన్నికలను తెచ్చారని, ఇప్పుడు ఈ ఉప ఎన్నికలను తెచ్చారని ఆయన అన్నారు. ప్రజాస్వామ్యంలో ఇటువంటి చర్యలు దురదృష్టకరమని ఆయన అన్నారు. తెలుగుదేశం పార్టీకి స్పష్టత లేదని ఆయన విమర్శించారు. పొత్తుల విషయంలో ఏ పార్టీతో పోవాలనే విషయంలో తెలుగుదేశం పార్టీలో అయోమయం నెలకొని ఉందని ఆయన అన్నారు.