షార్కును చంపితిన్న మొసలి

మెల్బోర్న్, మే 25: ఇన్నాళ్ళు షార్కులే సముద్రంలో భయంకరమైన జీవులుగా భావిస్తున్నాం. కానీ ఒక షార్కుని ఫలహారం కానిచ్చిన మొసలి ఒకటి 'డాలీ' నదిలో పౌల్ వాన్ బర్గర్ కంటబడింది. బర్గర్ వృత్తిరిత్యా జాలరి. ఆయన 2.3 మీటర్ల మొసలి ఒకటి షార్కుని చంపితినే దృశ్యాన్ని వీక్షించి ఫొటోలు కూడా తీశారు. "డాలీ నదిలో ప్రయాణిస్తుండగా నీటిలోని చిన్న అలజడి మా దృష్టిని ఆకర్షించింది. మొదట మాకు నీళ్ళ పై షార్కు తోక కనబడింది. ఆ తర్వాత ఒక మొసలి దాన్ని తన నోట కరిచి పట్టుకుంది. మొసలి షార్కును నేలపైకి తీసుకొచ్చింది, తినడం ప్రారంభించింది. "అని బర్గర్ తను చూసిన అసాధారణ దృశ్యాన్ని వివరించారు.

"షార్కును మొసలి తినడం వింతైతే, అంతకన్నా మమ్మల్ని ఆశ్చర్యపరచిన విషయం నేలపైకి షార్కుని తీసుకొస్తే తన పని సులువవుతుందని భావించిన మొసలి ఆలోచనా శక్తి. అదే షార్కు స్ధానంలో నేలపై తిరిగే మరో జీవి ఉంటే మొసలి దాన్ని నీటిలోకి లాగి, ఊపిరాడనీయకుండా నీటిలో ముంచి చంపేది. షార్కు ఎప్పుడూ నీళ్లలోనే ఉంటుంది కాబట్టి మొసలి దాన్ని ఒడ్డుకు తీసుకొచ్చి చంపింది. 15మీటర్ల దూరం నుండి ఆ సంఘటనను ఆసాంతం చూశాను" అని బర్గర్ తన అనుభవాన్ని వివరించారు.