సిఎంగా వైయస్ తగరు: చంద్రబాబు

విజయవాడ: రక్తపాతానికి అలవాటు పడిన వైయస్ రాజశేఖర రెడ్డి ముఖ్యమంత్రి పదవికి తగరని తెలుగుదేశం పార్టీ అధ్యక్షుడు నారా చంద్రబాబునాయుడు అభిప్రాయపడ్డారు. చంద్రబాబు మీ కోసం యాత్ర శుక్రవారానికి 40వ రోజుకు చేరుకుంది. కృష్ణా జిల్లా పెనుగంచిప్రోలు నుంచి ఆయన శుక్రవారం తన యాత్రను ప్రారంభించారు. పెనుగంచిప్రోలులో ఆయన ప్రత్యేక పూజలు నిర్వహించారు.

ముఖ్యమంత్రి వైయస్ అరాచకాలకు కడప జిల్లాలో శుక్రవారం జరిగిన హత్య నిదర్శనమని ఆయన వ్యాఖ్యానించారు. రామకృష్ణారెడ్డి అనే తెలుగుదేశం నాయకుడు కడప జిల్లాలో దారుణ హత్యకు గురైన విషయం తెలిసిందే. తాను ఉప ఎన్నికల్లో ప్రవర్తనా నియమావళిని ఉల్లంఘించలేదని ఆయన చెప్పుకున్నారు. ఉప ఎన్నికల్లో ఓట్ల గల్లంతు ప్రభుత్వ కుట్ర అని ఆయన అన్నారు. ప్రతిపక్షాలకు చెందిన ఓట్లను రద్దు చేశారని ఆయన విమర్శించారు. ఇటువంటి చర్యల పట్ల ఎన్నికల కమీషన్ జాగ్రత్త వహించాల్సి ఉందని ఆయన అన్నారు.