వైయస్ ఆరెస్టుకు యనమల డిమాండ్

కాకినాడ: ఎన్నికల ప్రవర్తనా నియమావళిని ఉల్లంఘించిన ముఖ్యమంత్రి డాక్టర్ వైయస్ రాజశేఖర రెడ్డిని అరెస్టు చేయాలని తెలుగుదేశం పార్టీ నాయకుడు యనమల రామకృష్ణుడు డిమాండ్ చేశారు. ఎన్నికల నియమావళి ఉల్లంఘనకు గాను పోలీసు కేసు నమోదైనందున ముఖ్యమంత్రిని అరెస్టు చేయాలని ఆయన శుక్రవారం మీడియా ప్రతినిధుల సమావేశంలో అన్నారు. చట్టానికి ఎవరూ అతీతులు కారని, రాజశేఖర రెడ్డి పట్ల చట్ట ప్రకారం వ్యవహరించాల్సి ఉందని ఆయన అన్నారు.

ప్రజాస్యామ్యాన్ని, రాజ్యాంగాన్ని పరిరక్షించాల్సిన ముఖ్యమంత్రే ఎన్నికల నియమావళిని ఉల్లంఘించారని కేసు నమోదు కావడం ప్రభుత్వానికి అవమానకరమని ఆయన అన్నారు. ఉప ఎన్నికల్లో ఎలాగైనా గెలిచి తీరాలనే ఉద్దేశంతో ముఖ్యమంత్రి ఇష్టారాజ్యంగా వ్యవహరించారని, ఎన్నికల ప్రవర్తనా నియమావళిని ఉల్లంఘించారని ఆయన అన్నారు.