తెలంగాణపై ప్రజలు నమ్మారు: బాబు

కాకినాడ: తెలంగాణ వంటి సున్నితమైన అంశాలపై నాయకులు సంయమనంతో వ్యవహరించాలని తెలుగుదేశం పార్టీ అధ్యక్షుడు నారా చంద్రబాబునాయుడు సూచించారు. కాకినాడ సమీపంలోని తిమ్మాపూర్ లో జరిగిన పార్టీ పోలిట్ బ్యూరో అనంతరం ఆయన బుధవారం మీడియా ప్రతినిధుల సమావేశంలో మాట్లాడారు. తెలంగాణకు తాము వ్యతిరేకం కాదని తాము వేసిన కమిటీని విశ్వసించారు కాబట్టే ఉప ఎన్నికల్లో ప్రజలు తమకు ఓటు వేశారని ఆయన అన్నారు.

అధిక ధరలపై ఈ నెల 15వ తేదీ నుంచి నెలాఖరు వరకు మండల స్థాయిలో ఆందోళనలు చేస్తామని ఆయన చెప్పారు. ఉప ఎన్నికల్లో పార్టీ అభ్యర్థులకు వ్యతిరేకంగా పనిచేసినవారిపై చర్యలు తీసుకుంటామని, రెండు మూడు రోజుల్లో ఈ విషయంపై నిర్ణయం తీసుకుంటామని ఆయన చెప్పారు. బెల్టు షాపులకు వ్యతిరేకంగా తెలుగు మహిళ ఆధ్వర్యంలో ఉద్యమాలు జరుగుతాయని ఆయన చెప్పారు.