చంద్రబాబుకు దేవేందర్ వివరణ

కాకినాడ: తెలంగాణపై వ్యాఖ్యలు చేసిన టి. దేవేందర్ గౌడ్ తూర్పు గోదావరి జిల్లా తిమ్మాపూర్ గ్రామంలో తమ తెలుగుదేశం పార్టీ అధ్యక్షుడు నారా చంద్రబాబునాయుడుతో చర్చలు జరిపారు. దాదాపు అర గంటసేపు ఈ చర్చలు జరిగాయి. తదనంతరం పార్టీ నాయకులు ఎర్రంనాయుడు, యనమల రామకృష్ణుడు ఈ చర్చల్లో భాగం పంచుకున్నారు. తెలంగాణపై కమిటీ వేసినందున తెలంగాణపై ఎవరూ మాట్లాడకూడదని దేవేందర్ గౌడ్ అన్నట్లు తెలిసింది. అయితే దీన్ని కె. ఎర్రంనాయుడు వ్యతిరేకించారని సమాచారం.

కాకినాడ సమీపంలోని తిమ్మాపూర్ లో తెలుగుదేశం పార్టీ పొలిట్ బ్యూరో సమావేశం ఏర్పాటైంది. ఈ సమావేశానికి ముందే దేవేందర్ తాను చేసిన వ్యాఖ్యలపై చంద్రబాబుకు వివరణ ఇచ్చినట్లు సమాచారం. ఈ నెల 18వ తేదీన జరిగే సమావేశంలో కమిటీ విధివిధానాలను ఖరారు చేయనున్నట్లు ఎర్రంనాయుడు చెప్పారు. తాను తెలంగాణవాదంపై గెలవలేదని వరంగల్ పార్లమెంటు సభ్యుడు ఎర్రబెల్లి దయాకర్ రావు అన్నారు. తెలంగాణవాదాన్ని పార్టీ నాయకత్వం కాదన్నా తనకు సమ్మతమేనని ఆయన అన్నారు.