ఎత్తుగడల రీత్యా విజయం: కెసిఆర్

హైదరాబాద్: ఎత్తుగడల రీత్యా తాము విజయం సాధించామని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు అన్నారు. 0.5 నుంచి 1.5 శాతం ఓట్లు వచ్చి ఉంటే తాము అనుకున్న లక్ష్యం సాధించగలిగి ఉండేవాళ్లమని ఆయన అన్నారు. పార్టీ కార్యవర్గ సమావేశంలో ఆయన బుధవారంనాడు మాట్లాడారు. ధనప్రవాహం విచ్చలవిడిగా పారిందని, దాని నుంచి మనల్ని కాపాడేదే మేధావుల మద్దతు అని, వారిని అడగకపోతే ఎట్లా అని ఆయన అన్నారు. వాస్తవాలను తాము ఒప్పుకోవాలని, ఆత్మపరిశీలన చేసుకోవాలని ఆయన అన్నారు.

సంస్థాగత లోపాలను సరిదిద్దుకోవాల్సి ఉంటుందని ఆయన చెప్పారు. కొన్ని పద్ధతులు, పద్ధతులను మార్చుకుంటే సరిపోతుందని మేధావులు అంటున్నారని ఆయన చెప్పారు. ఉప ఎన్నికల్లో కొంత వైఫల్యానికి నిర్లిప్తత కారణమని ఆయన అన్నారు. రాజీనామాలు చేయాలనేది ఒక్క కెసిఆర్ ఆలోచన కాదని, మేధావుల అభిప్రాయం తీసుకున్నామని, ప్రజల అంగీకారం తీసుకున్నామని ఆయన చెప్పారు. తెలంగాణ వ్యతిరేక శక్తులను, వ్యక్తులను ప్రజాకోర్టుకు లాగాల్సిందేనని ప్రజలు అన్నారని, ఆ మేరకే రాజీనామాలు చేసి ఉప ఎన్నికలను ఆహ్వానించామని ఆయన చెప్పారు.