వైయస్ పై ఉప్పునూతల పరోక్ష విసుర్లు

హైదరాబాద్: వయసు పెరుగుతున్న కొద్దీ సీనియర్లలో భయం పెరుగుతోందని ముఖ్యమంత్రి డాక్టర్ వైయస్ రాజశేఖర రెడ్డి చేసిన వ్యాఖ్యపై తెలంగాణ ప్రాంతీయ బోర్డు చైర్మన్ ఉప్పునూతల పురుషోత్తమ రెడ్డి పరోక్షంగా విమర్శ చేశారు. వయసు పెరుగుతున్న కొద్దీ బాధ్యత పెరుగుతుంది కాబట్టే సీనియర్లలో భయం ఉంటుందని, బాధ్యత లేనివారికి భయం ఎందుకు ఉంటుందని ఆయన బుధవారం మీడియా ప్రతినిధులతో అన్నారు.

వచ్చే ఎన్నికల్లో కాంగ్రెసుకు 230 శాసనసభా స్థానాలు, 36 లోకసభ స్థానాలు వస్తే సంతోషమేనని ఆయన అన్నారు. తెలంగాణ ఇవ్వకపోతే వచ్చే ఎన్నికల్లో కాంగ్రెసుకు అన్ని సీట్లు వస్తాయో రావో వారం రోజలు తర్వాత చెప్తానని ఆయన అన్నారు. కార్యాలయాన్ని ఖాళీ చేయాలని ఆర్టీసి తమకు నోటీసు ఇవ్వడాన్ని ఆయన తప్పు పట్టారు. ఆర్టీసి ప్రభుత్వానికి నోటీసు ఇవ్వాలని ఆయన అన్నారు. కార్యాలయాన్ని ప్రభుత్వం తమకు అప్పగించిందని, ఖాళీ చేయాలంటే ప్రభుత్వం తమకు చెప్పాలని ఆయన అన్నారు.