ప్రజాస్వామ్యానికి గొడ్డలిపెట్టు: బాబు

శ్రీకాకుళం: ఆంధ్రజ్యోతి ఎడిటర్ కె. శ్రీనివాస్, ఇతర జర్నలిస్టుల అరెస్టు ప్రజాస్వామ్యానికి గొడ్డలి పెట్టు అని తెలుగుదేశం పార్టీ అధ్యక్షుడు నారా చంద్రబాబునాయుడు అన్నారు. ముఖ్యమంత్రి డాక్టర్ వైయస్ రాజశేఖర రెడ్డి నియంతలా వ్యవహరిస్తున్నారని ఆయన బుధవారం మీడియా ప్రతినిధులతో అన్నారు. ప్రజాస్వామ్యాన్ని అపహాస్యం చేసినవారంతా కాలగర్భంలో కలిసిపోయారని, వైయస్ కు కూడా అదే గతి పడుతుందని ఆయన అన్నారు.

జర్నలిస్టుల అరెస్టుకు నిరసనగా చంద్రబాబు రాస్తారోకోలో పాల్గొన్నారు. పలాస వద్ద జర్నలిస్టులు నిర్వహించిన రాస్తారోకోలో ఆయన పాల్గొన్నారు. జర్నలిస్టుల అరెస్టును తెలుగుదేశం పార్లమెంటరీ పార్టీ నాయకుడు కె. ఎర్రంనాయుడు కూడా ఖండించారు. అరెస్టులపై ప్రభుత్వం బేషరతుగా క్షమాపణ చెప్పాలని చంద్రబాబు డిమాండ్ చేశారు. అరెస్టయిన జర్నలిస్టులను వెంటనే విడుదల చేయాలని కూడా ఆయన డిమాండ్ చేశారు. జర్నలిస్టుల ఆందోళనకు తమ మద్దతు కొనసాగుతుందని ఆయన చెప్పారు.